Լեռնային Ղարաբաղի ժողովուրդն իր համար անսպասելի կերպով բախվել է բազմաթիվ խնդիրների: Մարդիկ թողել են իրենց ունեցած ամեն ինչ եւ տեղափոխվել Հայաստան: Այս մասին լրագրողների հետ հանդիպման ժամանակ ասաց Շուշիի նախկին քաղաքապետ Արծվիկ Սարգսյանը:
Նրա պնդմամբ՝ նրանցից շատերի մոտ մնացել են միայն այն իրերը, որոնք նրանց հագին են եղել: «Մարդիկ պարզապես չգիտեին՝ ինչ է կատարվում: Նրանք մտածում էին, թե մեկնում են մի քանի օրով, եւ որ նրանց հարցերը կլուծվեն, եւ նրանք կվերադառնան իրենց տներ: Սակայն, ցավոք, դա տեղի չունեցավ»,-ասաց Սարգսյանը:
Նրա խոսքով՝ խնդիրները շատ են: Դրանք կապված են եւ՛ կենցաղային անբարենպաստ պայմանների, եւ՛ ուտելիքի, եւ՛ հագուստի հետ: «Այո, կան բարեգործական կազմակերպություններ, բարի մարդիկ, սակայն դա այն չէ, ինչ նրանց պետք է: Դա, ցավոք, բավարար չէ»,-նկատեց Սարգսյանը:
Թշնամու կողմից օկուպացված քաղաքի նախկին ղեկավարը նկատեց, որ Հայաստանում բնակարան վարձելը աստղաբաշխական գումար է փախստականների համար: Պետությունը, իհարկե այդ մասով ֆինանսական աջակցություն է ցուցաբերում, սակայն հատկացված միջոցները բավարար չեն: «Կա ծրագիր, ըստ որի՝ Ղարաբաղից փախստականներին հատկացնում են 68 հազար դրամ, ապա եւս 15 հազար դրամ: Սակայն այդ պետական ծրագիրը ինչ-ինչ պատճառով չի տարածվում 18-58 տարեկան տղամարդկանց վրա: Այո, ես մի քանի անգամ բարձրացրել եմ այդ հարցը, սակայն ինձ ասել են՝ «թող գնան եւ աշխատեն»: Որտե՞ղ պետք է նրանք աշխատեն, չէ՞ որ աշխատանք չկա»,-ասաց Շուշիի նախկին ղեկավարը: