Շուշին հայկական է, ունի հայոց պատմություն եւ հանդիսացել է մեր մշակութային ամենակարեւոր օջախներից մեկը։ Այս մասին այսօր՝ հունվարի 25-ին, «Ձայն հայրենեաց» նախաձեռնության հավաք-քննարկման ժամանակ հայտարարեց պատմական գիտությունների թեկնածու, պրոֆեսոր Էդուարդ Գեւորգյանը։
«Այսօր թիվ մեկ խնդիրը ազգային անվտանգությունն է։ Այս պահին, երբ հակառակորդը հայաթափման լրջագույն կոչեր է անում, որոնք շատ նման են 1915 թվականի երիտթուրքերի կոչերին՝ սպանել հայերին, չխնայել անգամ նորածին երեխային, մենք փորձում ենք ապացուցել Շուշին հայկական է թե՝ ոչ։
Շուշին հայկական է, Շուշին ունի հայոց պատմություն, Շուշին ունի հարուստ պատմություն եւ հանդիսացել է մեր մշակութային ամենակարեւոր օջախներից մեկը։ Ուշադրություն դարձնենք, որ ամբողջ ԼՂԻՄ-ում եղած ադրբեջանցիների ավելի քանի 73 %-ը բնակություն էր հաստատել Շուշիում․ նպատակը մեկն էր՝ արհեստականորեն ձեւավորված ադրբեջանական Քուրդիստանի հետ խափանել կապը Լեռնային Ղարաբաղի ինքնավար մարզի եւ Խորհրդային Հայաստանի միջեւ։ Կարծում եմ՝ նույն նպատակն այսօր նրանք հետապնդում են՝ խափանել կապը»,-ասաց նա:
Գեւորգյանը հավելեց, որ այսօր խոսել այն մասին, թե Շուշիում մեծամասնությունը կազմել են ադրբեջանցիները կամ կասկածի տակ առնել, որ այն հայկական է, անհարգալից վերաբերմունք է մեր պատմության նկատմամբ, եւ դրանով մենք մեր կյանքը վտանգում ենք ամբողջովին. «Միթե մենք պետք է մեր պատմությունն անընդհատ զրո կետից սկսենք։Մեր ժողովուրդը պետք է հասկանա, որ իր արժեքային պահպանել է անհրաժեշտ»,- ասաց Էդուարդ Գեւորգյանը։
