Լեռնային Ղարաբաղի հակամարտության գոտում հրադադարի ռեժիմի վերահսկման ռուս-թուրքական համատեղ կենտրոնը բացվել է Ադրբեջանի Աղդամի շրջանի Քիյամադդինլի բնակավայրի տարածքում, հաղորդում է «Ինտերֆաքս»-ը:
«Կենտրոնը կհավաքի, կմփոփի եւ կստուգի տեղեկատվությունը հրադադարի ռեժիմի պահպանման եւ կողմերի կողմից ձեռք բերված պայմանավորվածությունները խախտող գործողությունների մասին»,- շաբաթ օրը լրագրողներին հայտնել է ՌԴ ՊՆ-ն:
Գերատեսչության խոսքով` վերահսկողությունը կիրականացվի անօդաչու թռչող սարքերի օգտագործման, ինչպես նաեւ այլ աղբյուրներից ստացված տվյալների գնահատման միջոցով:
Կենտրոնի անձնակազմը ներկայացված է հավասարության սկզբունքով` մինչև 60 զինծառայող յուրաքանչյուր կողմից: Այն կապի ուղիղ գծեր ունի հակամարտության կողմերի ռազմական հրամանատարության մարմինների եւ Ռուսաստանի խաղաղապահ զորախմբի շտաբների հետ: