ԱՄՆ կոնգրեսական Սթիվեն Լինչը, որը ներկայացնում է Մասաչուսեթս նահանգը Դեմոկրատական կուսակցության կողմից, ուրբաթ վարակվել է COVID-19-ով Pfizer ընկերության պատվաստանյութի երկրորդ դեղաչափը ստանալուց հետո, հաղորդում է CBS-ը:
Լինչը մի քանի կոնգրեսականներից մեկն է, որը վարակվել է կորոնավիրուսով վերջին շաբաթների ընթացքում:
Կոնգրեսականի մամուլի ծառայությունից հայտնել են, որ կորոնավիրուսի թեստի արդյունքը դրական էր:
Կոնգրեսական Լինչին ներարկվել է Pfizer պատվաստանյութի երկրորդ դեղաչափը, որից հետո ստացել է COVID-19-ի թեստի բացասական պատասխանը նախքան նախագահ Բայդենի երդմնակալության արարողությանը մասնակցելը: Նրա մոտ չեն նկատվում հիվանդության ախտանշաններ եւ ինքնազգացողությունը լավ է, սակայն նա ինքնամեկուսացել է»,-ասել է Լինչի մամուլի քարտուղար Մոլի Ռոուզ Թարփին: