Առնվազն հինգ մարդ, այդ թվում՝ հայտնի նախկին գեներալ է սպանվել Մոգադիշոյի հյուրանոցներից մեկի վրա «Ալ-Շաբաբ»-ի ժամեր տեւած հարձակման հետեւանքով: «Ալ-Քաիդա»-ին հարող ջիհադիստները ականավորված մեքենա են պայթեցրել «Աֆրիկ» հյուրանոցի մուտքի մոտ՝ օդանավակայանի մերձակայքի բանուկ խաչմերուկում, որից հետո գրոհայինները ներխուժել են հյուրանոց՝ փոխհրաձգություն սկսելով անվտանգության աշխատակիցների հետ, հաղորդում է AFP-ն:
Սոմալիի ոստիկանության ներկայացուցիչ Սադիկ Դուդիշեն մամուլի ասուլիսի ժամանակ ասել է, որ հարձակվողներից չորսը նույնպես սպանվել են: «Զոհվածների մեջ կա հինգ խաղաղ բնակիչ եւ գրոհայիններ, որնցից երեքը կրակել են իրենց վրա, եւ եւս մեկը պայթեցրել է իրեն: Զոհերի թիվը կարող է ավելի շատ լինել, իսկ վիրավորներից ոմանք կարող են մահանալ»: Նրա խոսքով՝ վիրավորվել է 10 մարդ:
Տեղեկատվության նախարարության հայտարարության մեջ ասվում է, որ մահացածներից մեկը հայտնի պաշտոնաթող գեներալ Մոհամմեդ Նուր Գալալն է:
Ահաբեկիչները հայտարարել են, որ 80-ամյա Գալալը հարձակման հիմնական թիրախն է եղել, քանի որ նա մասնակցել է իրենց մարտիկների ու առաջնորդների սպանությանը: