Այս փուլում ադրբեջանական կողմը փորձում է ցույց տալ, որ հակամարտությունը Ղարաբաղում լուծված եւ սպառված է, սակայն հայկական պատվիրակությունը, հակառակը, ցույց տվեց, որ կան չլուծված հարցեր, եւ Բաքուն խախտում է նոյեմբերի 9-ի եռակողմ հայտարարության դրույթը: Այս մասին փետրվարի 2-ին Հայաստանի Ազգային ժողովում մամուլի ասուլիսին հայտարարեց ԵԽԽՎ-ում հայկական պատվիրակության ղեկավար, արտաքին հարաբերությունների մշտական խորհրդարանական հանձնաժողովի նախագահ, «Իմ քայլը» իշխող դաշինքի պատգամավոր Ռուբեն Ռուբինյանը:
Ըստ նրա` այս համատեքստում որքան շատ Ադրբեջանին ուղղված կոչեր լինեն միջազգային հանրության կողմից` ԵՄ-ի, ԵԽԽՎ-ի կամ ցանկացած այլ կառույցի ամբիոններից, այնքան ավելի լավ: «Դա իր որոշակի ազդեցությունն ունի: Արդեն նշվել են գերիների հարցով Ադրբեջանի վրա միջազգային ճնշման առաջին դեպքերը»,- ասաց Ռուբինյանը:
