ՄԻԵԴ-ի վճռով Ադրբեջանի իշխանությունը տասնյակ հազար եվրո կվճարի ապօրինի ձերբակալված ընդդիմադիրներին:
Turan-ի հաղորդմամբ՝ դատարանը բավարարել է NİDA շարժման ակտիվիստներ Մամեդ Ազիզովի եւ Շահին Նովրուզլուի բողոքները, որոնք ձերբակալվել էին 2013 թվականի մարտին զանգվածային անկարգություններ պատրաստելու մեղադրանքով:
Ստրասբուրգի դատարանը վճռել է Ազիզովին փոխհատուցում վճարել բարոյական վնասի համար 20 հազար եվրո եւ եւս 1500 եվրո դատական ծախսերի համար:
Նովրուզլուին եւս փոխհատուցում կվճարվի 20 հազար եվրոյի չափով բարոյական վնասի համար եւ եւս 2000 եվրո դատական ծախսերի համար:
Ազիզովը եւ Նովրուզլուն դատապարտվել էին 7,5 եւ 6 տարվա ազատազրկման, համապատասխանաբար:
ՄԻԵԴ-ը հրապարակել է նաեւ «Ընդդեմ Ադրբեջանի Ֆաթմա Գանիեւի եւ այլոց» գործով որոշումը: Այդ գործում դատարանը ճանաչել է 18 հայտատուների սեփականության իրավունքի խախտումը, որոնք բողոքարկել էին իրենցից Բաքվի Սաբունչինի շրջանում հողատարածքների առգրավումը:
Նրանցից յուրաքանչյուրը կստանա 10 հազարական եվրո որպես փոխհատուցում բարոյական վնասի համար:
ՄԻԵԴ-ը նաեւ վճռել է 5350 եվրոյի չափով փոխհատուցում վճարել Իլգար Ֆեյզովին առանց դատարանի որոշման նրան օրենքով նախատեսվածից երկար կալանքի տակ պահելու համար: Այդ գործում դատարանը ճանաչել է Եվրոպական կոնվենցիայի 5-րդ հոդվածի խախտումը՝ ազատության եւ անձի անձեռնմխելիության իրավունքը: