News
Լրահոս
News
Կիրակի
Հուլիս 03
USD
407.95
EUR
426.35
RUB
7.46
Տեսնել լրահոսը


Եթերից զրկված Հ2 ալիքն իր իրավունքների վերականգնման համար կդիմի օրենքով թույլատրելի բոլոր քայլերին: Այս մասին փետրվարի 19-ին մամուլի ասուլիսում ասաց ալիքի փոխտնօրեն Լեւոն Սուլթանյանը:

Հիշեցնենք, որ հունվարի 15-ին հեռուստատեսության եւ ռադիոյի հանձնաժողովի որոշմամբ հեռուստաալիքը, որը հայրենական եթերում աշխատել է ավելի քան 20 տարի, մրցույթի արդյունքներով հեռարձակումից զրկվել էր: Սուլթանյանը որոշումը գնահատում է Հայաստանի պատմության մեջ աննախադեպ եւ հարված խոսքի ազատությանն ու ժողովրդավարությանը: Այս կապակցությամբ նա հիշեցրեց հարձակումները ընկերության սեփականատեր Սամվել Մայրապետյանի վրա եւ ընդհանրապես տեղի ունեցողը համարեց քայլեր՝ ուղղված հեռուստաալիքը լռեցնելուն:

Բացի որոշման քաղաքական ենթատեքստից, Լեւոն Սուլթանյանը մատնանշեց մի շարք ուղղակի խախտումներ: «Հիմա հանձնաժողովը փորձում է ամեն ինչ ներկայացնել որպես մրցույթի արդյունք: Այսինքն՝ սովորական գործընթաց է, ընկերությունը չի համապատասխանել պահանջներին: Մինչդեռ իրականությունն այլ հարթությունում է: Հայաստանի օրենսդրությունը եւ ՄԻԵԴ դիրքորոշումը հանձնաժողովից ուղիղ պահանջում են, որ նրա որոշումները հիմնավորված լինեն»,- շեշտեց Սուլթանյանը: Նա իրավիճակը համեմատեց ինստիտուտ ընդունվելու հետ: «Միայն այն, որ դիմորդներն ավելի շատ են, քան տեղերը, եւ մեկն ավելի շատ միավորներ է ստացել, դեռեւս հիմնավորում չէ: Պետք է հիմնավորել, թե ինչու է ամեն մեկն այդքան ստացել: Մրցույթի բոլոր չափորոշիչներով: Այս պահանջը գոյություն ունի այն պատճառով, որ բացառվեն կամայական որոշումները, եւ մասնակիցն ինքը հասկանա ու ուղղվի: Մյուս խնդիրն այն է, որ մրցույթի պահանջները պետք է հասկանալի լինեն. այսինքն՝ իմանալ, թե ինչ քննություն է հանձնվելու, եւ ինչպես են գնահատելու»,- համեմատությունը շարունակեց Սուլթանյանը:

Նա հիշեցրեց, որ որոշումը հրապարակելուց հետո հանձնաժողովին ղեկավար Տիգրան Հակոբյանը մի քանի հարցազրույց է տվել, որոնցից պարզ է դառնում, որ հանձնաժողովը հաշվի է առել ավելի քան 100 չափորոշիչներ՝ այն դեպքում, երբ օրենքը նշում է 7-ի մասին, իսկ հանձնաժողովն ընդհանրապես նշել էր 6: Հակոբյանը նույնիսկ պնդում է, որ որոշները մասնակիցներին հայտնի չէին: Սա մրցույթի կանխատեսելիության ուղղակի խախտում է: «ՄԻԵԴ-ը դեռեւս 2008 թվականին ընդունել էր նախադեպային որոշում, որն առնչվում էր А1+ ալիքին: Դրանում նույն հանձնաժողովի սխալներն էին նշված: Հատկապես, որ իր որոշումը չի հիմնավորել: Երբ ընդունվում էր А1+-ի վերաբերյալ որոշումը, մեր օրենսդրությունը նման պահանջ չուներ: ՄԻԵԴ որոշումից հետո այն մտցվեց եւ հիմա անտեսվել է»,- նշեց Լեւոն Սուլթանյանը:

Նրա խոսքով՝ հարցազրույցից հետո ալիքի աշխատակիցների եւ սեփականատերերի մոտ սուբյեկտիվ մոտեցման հիմնավոր կասկած է առաջացել: Առավել եւս, այն հանգամանքը, որ ալիքը ցանկանում էր համահանրապետական հեռարձակում ստանալ, ներկայացվել է որպես «ամբարտավանություն», չնայած Տիգրան Հակոբյանը գիտեր ալիքի դիրքորոշումն ու պատճառները, թե ինչու էր ձգտում ստանալ հանրապետական, այլ ոչ քաղաքային հեռարձակում: Սուլթանյանը նաեւ ուշադրություն դարձրեց այն փաստին, որ Հակոբյանը բացասական լույսի ներքո է մեկնաբանում երկու վարչական վարույթով ալիքի դատարան դիմելը եւ դատարանների կողմից հայցվորի օգտին որոշումների ընդունումը:

Սուլթանյանը պարզաբանեց այն պատճառները, թե ինչու էր ալիքը ցանկանում հանրապետական հեռարձակում ստանալ: Առաջին՝ երկու տասնամյակ աշատել է այդ հեռարձակմամբ, այսինքն՝ իր արտադրանքն ուղղված է հանրապետական պահանջարկին, իսկ ծրագիրը կազմված է հեռարձակման լայնությանը համապատասխան, երկրորդ՝ քաղաքային մրցույթին մասնակցությունը կնվազեցներ գործընկերների հնարավորությունները: Ընդ որում՝ Սուլթանյանը հատուկ շեշտեց հանրապետական հեռարձակումը որպես «ավելի լավ», իսկ քաղաքայինը «ավելի վատ» գնահատելու փորձերին անհամաձայնությունը:

Հանձնաժողովի այդ մոտեցումը պարզապես վիրավորական է, նկատեց նա:

Սուլթանյանը վստահ է, որ անկախ հեռուստատեսությունը, անկախ լրատվամիջոցները սպառնալիք են քաղաքական ղեկավարության համար, քանի որ նրանց հետ անհնար է պայմանավորվել: Շատերը դա իրենց վրա զգացել են տարբեր ժամանակներում, առավել եւս, որ խոսքը հանրապետական հեռարձակման լրատվամիջոցների մասին է: Նա վստահեցրեց, որ հեռուստաալիքը կպայքարի, եւ արդեն դիմել է դատարան: «Ես անձամբ ճիշտ եմ համարում խնդրի իրավական լուծումը: Նույնիսկ եթե վաղը քաղաքական որոշումը փոխվի, եւ մենք վերադառնանք եթեր, դա կարող է կրկնվել մեր գործընկերների հետ, իսկ մենք ցանկանում ենք իրավական հիմքեր ստեղծել: Քաղաքական ճանապարհով նման հարցերի լուծումը չի լուծի խնդիրն ընդհանուր առմամբ: Սակայն օրենքով չարգելված ցանկացած քայլի իրավունք ենք վերապահում»,- հայտնեց Սուլթանյանը:

Ինչ վերաբերում է դեռեւս ազատ քաղաքային հեռարձակման ալիքի մրցույթին մասնակցելու հնարավորությանը, Հ2-ը այն չի դիտարկել, սակայն չի բացառում: Ընդ որում, եթե նույնիսկ հեռուստաալիքը հաղթի այդ մրցույթում, չի պատրաստվում հրաժարվել հանրապետական հեռարձակման համար պայքարից:

Լեւոն Սուլթանյանն անհրաժեշտ համարեց պարզաբանել երկու հարց: Առաջինը վերաբերում է իրավիճակի աննախադեպությանը: «Աննախադեպ է այն պատճառով, որ Ա1+-ը (իր ժամանակին զրկվել է եթերից նմանատիպ հանգամանքների պատճառով - խմբ.) հանրապետական հեռարձակման ալիք չի եղել»,- պարզաբանեց նա: Երկրորդը վերաբերում է նախկինում «Պրոմեթեւս» անվանվող եւ այլ սեփականատիրոջ պատկանող Հ2-ի հայտարարությանը՝ կապված Ա1+-ի իրավիճակի հետ, որում ասվում է, որ ալիքը խոսքի ազատության սպառնալիք չի տեսնում: «Մենք ասում ենք, որ դա հարված է խոսքի ազատությանը, եւ եթե այսպես շարունակվի, իսկ մենք չարձագանքենք, ապա խոսքի ազատությունն իսկապես կանհետանա: Սակայն մենք դեռ այստեղ ենք եւ քննարկում ենք խնդիրը, որը կա»,- հայտարարեց Սուլթանյանը:

Պատասխանելով հարցին, թե ինչպես է ազդել որոշումն ալիքի աշխատանքի վրա՝ Սուլթանյանը վստահեցրեց, որ անձնակազմը շարունակում է աշխատել բնականոն հունով եւ մտադիր է այդպես շարունակել: Այնուամենայնիվ, Սուլթանյանի խոսքով, լրատվամիջոցների վրա ճնշում կա: Նրա խոսքով՝ իրավիճակը խոսում է այն մասին, որ տեղի ունեցածը միայն սկիզբն է, եւ եթե չվերացվի նախադեպը, այն կդառնա մահակ մյուսների համար:

Իր հերթին, ալիքի գլխավոր պրոդյուսեր Կարեն Հակոբյանը հայտնեց, որ ամռանը հեռուստադիտողին թարմացված եթեր է սպասվում: Լրատվական ծրագրի ղեկավար Շավարշ Գեւորգյանն էլ տեղեկացրեց, որ դեսպանատները եւ միջազգային կազմակերպությունները դեռ չեն արձագանքել իրավիճակի մասին իրենց նամակին:

!
Այս նյութը հասանելի է նաև   Русский
Տպել
Կարդացեք նաև
Ամբողջը
Team Telecom Armenia-ն Tech Week Gyumri-ի գործընկերն է
Մեր ընկերության կորպորատիվ սոցիալական պատասխանատվության շրջանակներում մենք աջակցում ենք երկրում իրականացվող կրթական ու գիտական նախաձեռնություններին...
«ՇԱՐԿ» ընկերության «5-րդ ալիք» տեսալսողական ծրագիրը տուգանվել է. ՀՌՀ
Հարուցված վարչական վարույթի շրջանակներում և տեսագրության մշտադիտարկման արդյունքում պարզվել է, որ Ընկերության «5-րդ ալիք» տեսալսողական ծրագրի կողմից «Հայլուր» լրատվական…
Ռոստելեկոմը հիմնել է ռոբոտաշինության ուսուցման հերթական լաբորատորիան այս անգամ Արարատի մարզի Շաղափ գյուղում
Ուրախ ենք փաստել, որ հստակ քայլերով գնում ենք դեպի այն տեխնոլոգիական երազանքը, որը կերտում ենք Հայաստանի երեխաների համար...
Ձեռներեցության Աշխարհի Գավաթ 2022-ի ազգային փուլի դիմումներն արդեն ընդունվում են (ֆոտո)
Արդեն երկրորդ տարին անընդմեջ մենք ձգտում ենք EWC Հայաստանը դարձնել իսկապես համազգային միջոցառում...
Հատուկ առաջարկ Team-ի բաժանորդներին` 50 Cent-ի, ZAZ-ի և Led Zeppelin Symphonic-ի համերգների համար (ֆոտո)
Առաջարկից օգտվելու համար ընկերության բաժանորդները պետք է 4545 կարճ համարին SMS-ով ուղարկեն «Team» բառը...
Վանաձորում բացվեց Team Telecom Armenia-ի զանգերի կենտրոնը (ֆոտո)
Մենք ցանկանում ենք մեր գործունեության սահմաններում նպաստել մարզերի զարգացմանը...
Ամենաշատ
Ֆոտոռեպորտաժներ