Նոր հետազոտությունը ցույց է տալիս, որ քաղաքային բնակավայրերում ապրող մկներն ավելի խելացի են, քան գյուղական բնակավայրերում ապրող կրծողները: Փորձագետները կարծում են, որ փողոցային մկների մոտ խնդիրները լուծելու ունակությունները բարելավվել են, քանի որ քաղաքներում համակեցությունը մարդկանց հետ նրանց ավելի խելացի է դարձրել, հաղորդում է Nat-geo-ն:
Պոստդամի համալսարանի եւ Մաքս Պլանկի անվան Էվոլյուցիոն կենսաբանության ինստիտուտի հետազոտողները 14 մուկ են բռնելԲեռլինի փողոցներում եւ եւս 17-ի` գյուղերից:
Աշխատության հեղինակները մի քանի խնդիր են դրել կրծողների առջեւ: Դրանցից մեկի ժամանակ մկները ստիպված էին սնունդ հայթայթել Lego կոնստրուկտորից պատրաստված տան մեջ, սակայն մինչ այդ նրանք պետք է հասկանային` ինչպես մտնել այնտեղ: Երկրորդ փորձի ժամանակ մկները ստիպված էին բացել պլաստիկ տուփի մետաղական կափարիչը եւ ստանալ պարգեւը:
Գիտնականները նշել են, որ քաղաքային մկներն ավելի խելացի էին եւ ավելի լավ էին ցուցադրում խոչընդոտները հաղթահարելու ունակությունները, իսկ գյուղերի կրծողներն ավելի վճռական էին եւ ավելի համառ:
Հետազոտողները ենթադրում են, որ քաղաքային պայմաններում մկներն ավելի շատ այլընտրանքներ ունեն եւ կարիք չունեն կանգ առնել սնունդ հայթհայթելու համար շատ բարդ խնդիրների վրա: Մինչդեռ քաղաքից դուրս ապրող մկների համար սնվելու հնարավորությունները սահմանափակ են, ուստի կարեւոր է առավելագույնս օգտվել դրանցից յուրաքանչյուրից, եթե այդպիսի հնարավորություն է առաջանում:
Ըստ գիտնականների` ամենալավ արդյունքները ցույց են տվել հենց քաղաքային մկները, որոնք 77 տոկոս դեպքերում լուծել են առաջադրված խնդիրները` գյուղական կրծողների 52 տոկոսի դիմաց: Գիտնականները դա պայմանավորում են նրանով, որ քաղաքային միջավայրում կյանքը կրծողների առջեւ ավելի բարդ եւ բազմազան խնդիրներ է դնում, որոնց լուծումն աստիճանաբար մտնում է այդ կրծողների զինանոցի մեջ: