Սաուդյան Արաբիան մտադիր է հաջորդ տասնամյակում 20 մլրդ դոլար ներդնել սեփական զենքի եւ ռազմական համակարգերի արտադրության մեջ:
Երկիրը ցանկանում է 2030 թվականին իր ռազմական բյուջեի նվազագույնը կեսը ծախսել տեղական մակարդակում: «Հաջորդ տասնամյակում մենք ավելի քան 10 մլրդ դոլար ենք ներդնելու Սաուդյան Արաբիայի ռազմական արդյունաբերության ոլորտում եւ նույնքան գումար՝ հետազոտությունների ու մշակումների մեջ»,- ասել է ռազմական արդյունաբերության գլխավոր վարչության (GAMI) ղեկավար Ահմեդ բին Աբդել Ազիզ Ալ Օհալին:
Նրա խոսքով՝ թագավորությունը նախատեսում է մեծացնել ռազմական հետազոտությունների եւ մշակումների ծախսերը՝ 2030 թվականին 0,2 տոկոսից հասցնելով շուրջ 4 տոկոսի:
Ավելի վաղ ԱՄՆ-ն հայտարարել էր Սաուդյան Արաբիային եւ Արաբական Միացյալ Էմիրություններին (ԱՄԷ) զենքի որոշ տեսակների վաճառքի ժամանակավոր սառեցման մասին:
ԱՄՆ նախագահ Ջո Բայդենի նոր վարչակազմը հայտարարել է, որ դադարեցնում է Թրամփի ժամանակաշրջանի զենքի վերջին համաձայնագրերի կատարումը, ներառյալ Սաուդյան Արաբիային ռազմամթերքի եւ ԱՄԷ-ին F-35 կործանիչների վաճառքը:
Մեծ Բրիտանիայի կառավարությունը ակտիվիստների քննադատությանն էր բախվել, երբ հայտնի էր դարձել, որ 2020 թվականի հուլիսից սեպտեմբեր ժամանակահատվածում հավանություն էր տվել Սաուդյան Արաբիային 1,9 միլիարդ դոլարի զենքի վաճառքին: