Մենք կցանկանայինք, որ ռազմագերիների վերադարձման գործընթացն ավելի արագ ընթանար եւ «բոլորը բոլորի հետ» սկզբունքով: Այս մասին փետրվարի 23-ին լրագրողների հետ զրույցում ասաց Հայաստանում Ռուսաստանի արտակարգ եւ լիազոր դեսպան Սերգեյ Կոպիրկինը:
Նրա խոսքով՝ ռազմագերիների վերադարձի աշխատանքը դժվարին է, բայց մշտապես կատարվում է, այդ թվում՝ Ռուսաստանի բարձրագույն ղեկավարության մասնակցությամբ: Նա հիշեցրեց, որ պարբերաբար տեղեկություններ են հայտնվում նոր խմբերի վերադարձի մասին: «Այս պահին ես տեղեկություններ չունեմ ռազմագերիների նոր խմբերի վերադարձի մասին»,- միեւնույն ժամանակ նշեց Կոպիրկինը:
Ի պատասխան NEWS.am-ի թղթակցի՝ այն փաստը մեկնաբանելու խնդրանքին, որ «բոլորը բոլորի հետ» սկզբունքով ռազմագերիների փոխանակման անհրաժեշտության մասին Ռուսաստանի ղեկավարության հայտարարությունները չեն արժանանում Բաքվի արձագանքին, եւ ինչո՞ւ Ադրբեջանը չի կատարում նոյեմբերի 9-ի եռակողմ հայտարարության համապատասխան կետը, ռուսական դիվանագիտական առաքելության ղեկավարը նշեց. «Ես այդ աշխատանքի մասնակից չեմ: Ուստի դժվարանում եմ որեւէ մանրամասն մեկնաբանություն կատարել, բայց ես մի բան գիտեմ՝ այս ուղղությամբ աշխատանք տարվում է»:
