Վրաստանում ԱՄՆ նախկին դեսպան Յան Քելլին կոչ է արել Վրաստանի իշխանություններին անհապաղ ազատ արձակել ընդդիմության ձերբակալված առաջնորդ Նիկա Մելիային, հայտնում է «Նովոստի-Գրուզիա»-ն:
«Ինչպես Վրաստանի շատ այլ բարեկամներ, մենք եւս մտահոգված ենք տեղի ունեցող երեւույթներով»,- ընդդիմադիր «Մթավարի» հեռուստաընկերությանը տված հարցազրույցում ասել է Յան Քելլին:
«Կառավարությունն անցել է սահմանը, ինչը բացարձակապես անընդունելի է եւ այն մասին չէ, թե ով ում կողմից է: Մենք պետք է համոզվենք, որ կառավարությունը ընտրություն է կատարում բռնության եւ ժողովրդավարության միջեւ»,- պարզաբանել է Քելլին:
Դիվանագետը կարծում է, որ «Վրացական երազանքը» դեռ ժամանակ ունի քաղաքական ճգնաժամը փակուղի չմտցնելու համար, իսկ ելքը Նիկա Մելիայի ազատ արձակումը կլիներ:
«Արեւմուտքը որոշակի լծակներ ունի, հատկապես` Միացյալ Նահանգները: ԱՄՆ-ում Վրաստանը գործընկեր, ժողովրդավարության եւ բազմակարծության մոդել է համարվում, սակայն խնդիրն այն է, որ վերջին իրադարձությունները ժխտում են այդ արժեքները: Ես կասեի, որ «Վրացական երազանքի» համար դեռ շատ ուշ չէ դեէսկալացիա իրականացնել` ազատ արձակել պարոն Մելիային եւ կոչ անել ընդդիմությանը նստել բանակցությունների սեղանի շուրջ:
Ես ներկայումս կառավարությունում չեմ աշխատում, սակայն սերտ կապեր ունեմ Բայդենի վարչակազմի ներկայացուցիչների հետ: Մենք կհետեւենք, թե ինչ քայլեր կձեռնարկի Վրաստանի կառավարությունը, եւ այդ քայլերը պետք է ուղղված լինեն երկխոսությանը, ինչը Նիկա Մելիայի անհապաղ ազատ արձակում է ենթադրում»,- ասել է Քելլին:
Ինչ վերաբերում է հարցին` արդյո՞ք ԱՄՆ-ն մտադիր է պատժամիջոցներ կիրառել Վրաստանի կառավարության անդամների նկատմամբ, Քելլին ասել է, որ իշխող թիմը պետք է Արեւմուտքին ցույց տա, թե որքանով լուրջ է մոտենում անդամակցությունը եվրաատլանտյան տարածքում, քանի որ «միակուսակցական կառավարումն անհամատեղելի է դրա հետ»:
«Եթե իշխանությունները գնան առճակատման ճանապարհով, ապա մենք կփորձենք անել այնպես, որպեսզի նրանք ստիպված լինեն որոշակի գին վճարել այդ որոշման համար»,- հաստատել է Յան Քելլին: Նրա խոսքով` Բայդենի վարչակազմը կարող է որոշում կայացնել պատժամիջոցների օգտագործման վերաբերյալ Վրաստանում իրադարձությունների ամփոփումից հետո:
Քելլին դիմել է նաեւ Վրաստանում գտնվող մարդկանց, ովքեր մասնակցում են փողոցային ցույցերին: «Իմ ուղերձը հետեւյալն է. եղեք ուժեղ. եթե կարող եք պաշտպանել այն արժեքները, որոնք այդքան կարեւոր են Արեւմուտքի համար, ապա կունենաք Արեւմուտքի աջակցությունը: Ես ցավով եմ լսում, երբ ասում են, որ բողոքի ցույցերն իրենց ձայնը կառավարությանը հասցնելու միակ միջոցն են: Դա շատ վտանգավոր իրավիճակ է»,- ասել է Յան Քելլին:
