Facebook Inc-ը խոստացել է առաջիկա երեք տարիների ընթացքում առնվազն 1 միլիարդ դոլար ներդնել լրատվական արդյունաբերության մեջ՝ նորությունների բովանդակության վճարման հարցում Ավստրալիայի կառավարության հետ բուռն հակասությունից օրեր անց:
Նախօրեին Facebook-ը վերականգնել էր նորությունների ավստրալիական էջերը՝ վերջ դնելով աննախադեպ արգելափակմանը այն բանից հետո, երբ կառավարությունը զիջումների է հասել առաջարկվող օրենքի հետ կապված, որը տեխնոլոգիական հսկաներից պահանջում է վճարել ավանդական մեդիաընկերություններին իրենց բովանդակության համար: Հաշիվների արգելափակումը ցնցել է գլոբալ նորությունների արդյունաբերությունը, որի բիզնես-մոդելն արդեն փոխվել է տեխնոլոգիական հսկաների կողմից:
Facebook-ը տեղեկացրել է, որ լուրերի արգելափակումը կապված է եղել ընկերության եւ նորությունների հրատարակիչների միջեւ հարաբերությունների «հիմնական թյուրիմացության» հետ:
Facebook-ը հայտնել է, որ 2018 թվականից ի վեր արդեն 600 միլիոն դոլար է ներդրել լրատվական ոլորտում: Ընկերությունը հավելել է, որ ակտիվորեն բանակցություններ է վարում Գերմանիայի եւ Ֆրանսիայի նորությունների հրատարակիչների հետ՝ իր նորությունների արտադրանքի համար բովանդակությունը վճարելու գործարքի շուրջ, որտեղ օգտվողները կարող են վերնագրեր եւ հոդվածներ գտնել անհատական լրահոսի կողքին: