Աշխարհի ամենազարգացած երկրները պետք է միահամուռ աշխատեն՝ օգնելու համար ավելի աղքատ երկրներին Covid-19-ի դեմ պատվաստանյութեր ձեռք բերել: Այս մասին հայտարարել է ԱՄՆ ֆինանսների նախարար Ջանեթ Յելենը:
«Ոչ մի երկիր միայնակ չի կարող հայտարարել այդ ճգնաժամերի նկատմամբ հաղթանակի մասին»,- հայտարարել է Յելլենը G20-ի ֆինանսների պատասխանատուներին ուղղված նամակում: «Սա գործողությունների եւ բազմակողմանիության պահ է»:
Նրա խոսքով՝ համաշխարհային տնտեսությանը ճգնաժամից հանելու ճակատամարտում «մեր առաջին մարտահրավերը պետք է լինի վիրուսի կասեցումը»՝ ամբողջ աշխարհում իմունիզացիայի միջոցով:
Զարգացող երկրները ահազանգ են հնչեցրել, որ ամենահարուստ երկրները սահմանափակում են աշխարհին պատվաստանյութերի մատակարարումները՝ հետեւում թողնելով իրենց աղքատ եղբայրներին։ Սրան արձագանքել են Արժույթի միջազգային հիմնադրամը եւ այլ կազմակերպություններ:
Յելլենը նախազգուշացրել է, որ դա կհանգեցնի մարդկային հետագա կորուստների եւ կդանդաղեցնի տնտեսության վերականգնումը, եւ G20-ին կոչ է արել «ավելացնել իր աջակցությունը՝ պատվաստանյութերի գլոբալ նախաձեռնությունների համար, ինչպիսին է COVAX-ը»։
«Ես կոչ եմ անում G20-ի երկրներին շարունակել հարկաբյուջետային եւ ֆինանսական քաղաքականության կարեւոր միջոցառումներ նախաձեռնումը եւ խուսափել աջակցության վաղաժամկետ դադարեցումից»,- ասել է նա:
