Փաշինյանի կալանավորման այլընտրանքը քաղաքացիական պատերազմն է: Սա է հենց նրա օրակարգը: Այս մասին փետրվարի 26-ին լրագրողների հետ հանդիպմանը ասաց «Բարգավաճ Հայաստան» կուսակցության խմբակցության պատգամավոր Նաիրա Զոհրաբյանը:
Նա հիշեցրեց Փաշինյանի հանձնարարականները Իջեւանի իրադարձությունների հետ կապված, երբ արյուն պահանջեց: Նրա խոսով՝ այդ մարդը քաոս է ուզում, որ պարետային ժամ մտցնի եւ իր իշխանությունը երկարացնի:
Զոհրաբյանը Ոստիկանությանը, ԱԱԾ-ին եւ Գլխավոր դատախազությանը կոչ արեց շտապ միջոցներ ձեռնարկել Փաշինյանի հայտարարությունների հետ կապված, որը Ազատության հրապարակում հավաքված քաղաքացիներին դավաճաններ անվանեց՝ դրանով ստեղծելով բախումների առիթ:
«Դրանից բացի, նա ասաց՝ թող գան ու ինձ գնդակահարեն: Այսինքն՝ նա ինքը հրաժարական չի տա, նա արյուն է ցանկանում եւ ամեն ինչ կանի, որ քաղաքացիական պատերազմ լինի: Նա գիտի, որ իր անունը գրվելու է դավաճանների անունների շարքում, եւ հիմա փորձում է հարուցել հանրության խղճահարությունը: Նա Արցախն ատում է: Դեռեւս 2007 թվականին էր ասում, որ Արցախը մեր գլխացավն է, եւ անհրաժեշտ է այդ խնդրից ազատվել, որպեսզի հաղորդուղիները ապաշրջափակվեն: Սա եւս մեկ պատճառ է, որ իրավապահները սկսեն ստուգել Արցախը հանձնելու տարբերակը: Ինձ համար նրանք, ովքեր ամեն կերպ արդարացնում են Նիկոլին, ժեխ են»,- շեշտեց Նաիրա Զոհրաբյանը:
Նրա խոսքով՝ Փաշինյանի երեկվա հանրահավաքի մասնակիցների թվում նաեւ նրանք էին, ում բերել էին հեռացնելու սպառնալիքով, բայց կային եւ այնպիսիները, որոնք նրան գիտակցված աջակցում են:
«Երեկ ինչո՞ւ Փաշինյանի կողմնակիցները չհարցրին, թե ինչու հաշվի չառավ իրենց կարծիքը, երբ ստորագրում էր կապիտուլյացիայի ակտը: Ինչո՞ւ չհարցրին, թե ինչու չի ընդունել Պուտինի առաջարկը, որ Շուշին պահպանի: Ինչո՞ւ Սյունիքում տարածքներ հանձնելու ֆոնին ոչ մեկը չի խոսում Արծվաշենի մասին, որը ԽՍՀՄ բոլոր քարտեզներով Հայաստանի տարածք է»,- հարց է տալիս պատգամավորը:
Նա հույս հայտնեց, որ ձեռնարկատերերը, որոնք ֆինանսավորում եւ սպասարկում են դավաճան իշխանությունների շահերը, հաջորդ իշխանությունների ժամանակ պատասխանատվության են ենթարկվելու: «Հակառակ դեպքում ես ամեն ինչ կանեմ, որ նրանց մուտքը արտասահմանյան երկրներ արգելափակվի: Ողջունում եմ Գլխավոր շտաբի հայտարարությունը: Դա այն բանի ընկալումն է, որ պետք է ծառայել Հայրենիքին, այլ ոչ թե թույլ տալ Թուրքիայի ու Ադրբեջանի շահերը սպասարկող անձին փակել հայկական պետականության վերջին էջը: Միաժամանակ ես այս հայտարարությունն ուշացած եմ համարում: Անհրաժեշտ էր Նիկոլի եռքը ավելի վաղ բռնել եւ թույլ չտալ, որ նա իրականացնի Թուրքիայի եւ Ադրբեջանի երազանքը»,- հավելեց Զոհրաբյանը: Պատգամավորը մյուս ուժային կառույցների սպաներին կոչ արեց դիմացկուն լինել եւ չենթարկվել Փաշինյանի սադրանքներին:
