Շաբաթ օրը հարյուրավոր լիբանանցիներ հավաքվել են, որպեսզի աջակցեն Մարոնիտ եկեղեցու պատրիարքի կոչերին՝ չեզոքություն պահպանել տարածաշրջանային հակամարտություններում՝ որպես երկիրը քաղաքական եւ տնտեսական ճգնաժամից դուրս բերելու միջոց, հաղորդում է Reuters-ը:
Լիբանանը 2019 թվականից տառապում է ֆինանսական ճգնաժամից, իսկ մրցակից քաղաքական գործիչները չեն կարողացել կառավարություն կազմավորել այն բանից հետո, երբ վերջին կաբինետը հրաժարական տվեց օգոստոսի 4-ին Բեյրութ նավահանգստում տեղի ունեցած ողբերգական պայթյունից հետո:
Մարոնիտ պատրիարք Բեշարա Բուտրոս ալ-Ռայը բազմիցս կոչ է արել քաղաքական մրցակիցներին պայմանավորվել նոր վարչակազմի շուրջ, իսկ վերջերս կոչ է արել միջազգային խորհրդաժողով անցկացնել ՄԱԿ-ի հովանու ներքո, որը կօգնի դուրս գալ փակուղուց:
«Դուք եկել եք ամբողջ Լիբանանից... որպեսզի աջակցություն հայտնեք երկու հարցի շուրջ՝ չեզոքություն եւ ՄԱԿ-ի հովանու ներքո Լիբանանի համար միջազգային խորհրդաժողովի անցկացում: Մի խոսքով, դուք եկել եք այստեղ, որպեսզի փրկեք Լիբանանը»,- ասել է Լիբանանի ամենաբարձրաստիճան քրիստոնյա քահանա Ռայը՝ դիմելով Բկերկի եկեղեցում հավաքված բազմությանը:
«Միջազգային խորհրդաժողովի միջոցով մենք ցանկանում ենք հայտարարել Լիբանանի չեզոքությունը, որպեսզի այն չդառնա հակամարտությունների, պատերազմների եւ պառակտումների զոհ: Մի հողում չի կարող լինել երկու պետություն, եւ չի կարող լինել երկու բանակ մեկ պետության մեջ»,- ասել է Լիբանանի քրիստոնյա պատրիարքը:
Ավելի վաղ, հոկտեմբերին Լիբանանի վարչապետ Սաադ Հարիրիին հանձնարարվել էր կառավարություն ձեւավորել, բայց դա դեռեւս տեղի չի ունեցել: Հարիրին հայտարարել է, որ ինքը ելք չի տեսնում այն ճգնաժամից, որը տիրել է առանց արաբական պետությունների աջակցության: