Ակնկալվում է, որ առաջիկա առցանց գագաթնաժողովի ժամանակ Մեքսիկայի նախագահ Անդրես Մանուել Լոպես Օբրադորը կխնդրի իր ամերիկացի գործընկեր Ջո Բայդենին կիսվել կորոնավիրուսի դեմ պատվաստանյութերով, հաղորդում է Reuters-ը՝ հղում անելով ԱՄՆ-ի եւ Մեքսիկայի պաշտոնատար անձանց:
Բայդենը պատրաստ է քննարկել այդ հարցը COVID-19 համավարակի դեմ պայքարում համագործակցության ուղղությամբ ավելի լայն տարածաշրջանային ջանքերի շրջանակում, սակայն որպես առաջնահերթություն նա կպահպանի հնարավորինս շատ ամերիկացիներ պատվաստելու անհրաժեշտությունը, հայտարարել է Սպիտակ տան ներկայացուցիչն անանունության պայմաններում:
Լոպես Օբրադորն առաջնորդների թվին է դասվում, որոնք պահանջում են, որ հարուստ երկրները բարելավեն պատվաստանյութերի նկատմամբ աղքատ երկրների հասանելիությունը: Նա անվանել է բաշխման ներկայիս համակարգը «ամբողջովին անարդար»:
Թեպետ Բայդենը մեծացրել է ֆինանսավորումը COVID-19-ի դեմ պայքարում միջազգային ջանքերի ուղղությամբ՝ նա կարող է բախվել քաղաքական հետեւանքների հետ, եթե գործի չափազանց արագ, որպեսզի ուղարկի պատվաստանյութն այլ երկրներ, քանի դեռ Միացյալ Նահանգներն ավելացնում են տեմպերը, սակայն դեռեւս ամբողջ ուժով փորձում են բավարարել ներքին պահանջմունքները:
Մեքսիկայում պատվաստման ծրագիրը հետաձգվում է դանդաղ մատակարարումների պատճառով՝ չնայած դեղորայքի միջազգային արտադրողների հետ համաձայնագրերին, որոնք նախատեսված են 126 միլիոն մարդու համար խմբաքանակի ձեռքբերմանը:
Քանի որ Pfizer Inc.-ի մատակարարումները սահմանված ժամանակացույցից ուշանում են, Մեքսիկան ամբողջ ուժով փորձում է լրացնել այդ բացը՝ իրականացնելով ռուսական Sputnik V եւ չինական Sinovac պատվաստանյութերի առաջին մատակարարումները:
Մեքսիկայում գրանցվել է կորոնավիրուսի հետեւանքով ավելի քան 185000 մահվան դեպք եւ ավելի քան 2 միլիոն վարակակիր:
