Հայաստանի վարչապետ Նիկոլ Փաշինյանը մարտի 1-ին հաղթեց ընդդիմության հետ փողոցային դիմակայությունում: Երեւանում իր կողմից հրավիրված երեկոյան հանրահավաքը շարունակվեց գիշերային քայլերթով քաղաքով, որն անձամբ ղեկավարում էր պարոն Փաշինյանը: Այդ օրը կառավարության ղեկավարը հակագրոհ ձեռնարկեց հակառակորդների վրա եւ ցույց տվեց, որ ինքը կարող է իշխանություն լինել եւ միեւնույն ժամանակ լիովին հեղափոխական պայքար մղել հակառակորդների հետ, փոխանցում է «Կոմերսանտ»-ը:
Նիկոլ Փաշինյանին հաջողվում է անհնարինն անել քաղաքականության մեջ: Ունենալով երկրի ողջ ուժը` նա անհրաժեշտության դեպքում ակնթարթորեն մտնում է հեղափոխականի դերի մեջ: Եվ այդ մագիան աշխատում է: Մարտի 1-ին նրա կոչով վարչապետի տասնյակ հազարավոր կողմնակիցներ հնազանդորեն լցրեցին Հանրապետության կենտրոնական մայրաքաղաքի հրապարակը:
Վարչապետը հրապարակ մտավ հենց կառավարության շենքից` անվտանգ միջանցքով, որը նախապես ձեւավորել էին ոստիկանության աշխատակիցները: Նա բարձրացավ բեմ եւ ավելի քան մեկ ժամ դիրիժորություն արեց` ամբոխին ստիպելով մե՛կ հավանություն տալով բղավել, մե՛կ վրդովված գվգվալ, մե՛կ հնազանդորեն լռել: Դա հիպնոզի էր նման եւ ամենից շատ հիշեցնում էր 2018-ի թավշյա հեղափոխության հանրահավաքները:
Եթե Նիկոլ Փաշինյանը ֆիլմում նկարահանվեր, նա կարող էր «Օսկարի» հավակնել: Եթե չիմանալ, որ բեմից մի մարդ է խոսում, ով երեք տարի ղեկավարում է երկիրը, կարելի է կարծել, որ վառ հռետորն ընդդիմության առաջնորդն է, ով ժողովրդին ռեժիմի դեմ պայքարի է հանում:
Այն, որ նա այստեղ իշխանություն է ներկայացնում, պարոն Փաշինյանը հասկացրել է միայն մեկ անգամ՝ ելույթի սկզբում ներողություն խնդրելով թույլ տված սխալների համար: Ելույթի մնացած մասում արդեն ոչ թե վարչապետ Փաշինյանն էր, այլ հեղափոխական Փաշինյանը: Նա հայտարարել է, որ Հայաստանում միայն ժողովուրդն է կարող որոշել, թե ով պետք է լինի իշխանության: Սա պատասխանն է ընդդիմության եւ Գլխավոր շտաբի սպաների նրա հրաժարականի պահանջին, որը վարչապետն անվանել է «ժողովրդից իշխանությունը խլելու փորձ»:
Փաշինյանը նորություն է հայտնել՝ այս տարվա հոկտեմբերին տեղի կունենա սահմանդրական հանրաքվե՝ կառավարման կիսանախագահական համակարգին վերադառնալու հարցով:
«Իմ քայլը» խմբակցությունում «Կոմերսանտի» աղբյուրը չներկայանալու պայմանով հայտնել է, որ արտահերթ ընտրությունների կազմակերպման գործընթացը կգործարկվի ամենամոտ ժամանակում՝ այն բանից անմիջապես հետո, երբ լուծվի Գլխավոր շտաբի պետի հարցը:
Զրուցակցի խոսքով՝ նախագահը պատրաստ է ստորագրել ԳՇ պետի ազատման մասին վարչապետի ներկայացրած երկրորդ միջնորդությունը: «Հենց Արմեն Սարգսյանը այն ստորագրի, մենք կսկսենք արտահերթ ընտրությունների կազմակերպումը: Մենք այն դիտարկում ենք որպես ստեղծված իրավիճակից ելք»,- ասել է իշխող դաշինքի պատգամավորը:
