Առաջ քաշելով կիսանախագահական կառավարման համակարգի մասին գաղափարը՝ ՀՀ վարչապետ Նիկոլ Փաշինյանը պարզապես փորձում է տարբեր մանիպուլյացիաներով պահել իշխանությունը: Այս մասին այսօր՝ մարտի 2-ին, լրագրողների հետ զրույցում ասաց «Բարգավաճ Հայաստան» կուսակցության պատգամավոր Նաիրա Զոհրաբյանը:
Նա հիշեցրեց, որ Փաշինյանը ժամանակին կիսանախագահական մոդելը համարում էր ձախողված կառավարման համակարգ եւ խորհրդարանական համակարգը համարում ավելի ճկուն եւ ժողովրդավարական:
Զոհրաբյանը վստահություն հայտնեց, որ Փաշինյանի օրոք ցանկացած քաղաքական միջոցառում կեղծված կլինի՝ հաշվի առնելով վարչական ռեսուրսի աննախադեպ կիրառումը նախօրեին: «Փաշինյանն ունակ չէ ազատ եւ արդար ընտրություններ կամ հանրաքվե անցկացնելու, նա պետք է հեռանա: Երեկվա հանրահավաքը հերթական պարտությունն ու խայտառակությունն էր, քանի որ նախկինում նա կարող էր հավաքել 100 հազար մարդ, իսկ հիմա՝ 20 հազար»,-նշեց պատգամավորը:
Նրա գնահատմամբ՝ երեկ իշխանությունն, ըստ էության, երեկույթ էր կազմակերպել, ինչը անհարգալից վերաբերմունք է Ղարաբաղի, զոհերի հիշատակի եւ գերի ընկածների նկատմամբ: «Դա նման էր Հայաստանում Ալիեւի գրասենյակի հաղթական շքերթի: Փաշինյանը երեկ մարդկանց մեղադրում էր դավաճանության մեջ, ապա նրանց երկխոսության կոչ անում»,-ասաց Զոհրաբյանը:
Նա վստահեցրեց, որ ընդդիմությունը չի հեռանա Բաղրամյան պողոտայից, քանի դեռ Փաշինյանը չի հասկացել, որ պետք է հեռանա:
