ՀՀ ոստիկանության պաշտոնական տվյալների համաձայն՝ 2020 թվականին ՃՏՊ-ների թիվը նվազել է՝ համեմատած 2019 թվականի հետ:
Եթե 2019 թվականին գրանցվել է 3443 ՃՏՊ, ապա 2020-ին՝ 2855: 2019-ին ՃՏՊ-ների զոհերի թիվը եղել է 253, 2020-ին՝ 217: 2019-ին վիրավորների թիվը եղել է 4960, 2020-ին՝ 4203: 2020 թվականին պանդեմիայի հետեւանքով հանրապետությունը մի քանի ամիս գտնվում էր կարանտինի մեջ, չէին աշխատում ուսումնական հաստատությունները, տեղաշարժն իրականացվում էր հատուկ անցաթղթով:
Միեւնույն ժամանակ, ոստիկանությունը խոշոր ՃՏՊ-ներ է ֆիքսում զոհերով եւ վիրավորներով: Շատ «փոքր» ՃՏՊ-ներ չեն հայտնվում վիճակագրության մեջ: Խախտումները, որոնք չեն ֆիքսում արագաչափերը, տեսանկարահանող սարքերը, մնում են առանց որեւէ ուշադրության: Սակայն մարդկային բնությունն այնպիսին է, որ անօրինությունը ծնում է հանցանք: Խնդրի մասին վկայում են վերջին շրջանում սարսափելի վթարները:
Եթե նախկինում Հայաստանում «ջիգիթներն» իրենց թույլ էին տալիս կարմիր լույսի տակ կամ հանդիպակաց ճանապարհով քշել, ապա հիմա դա տարածված է գրեթե ամենուր: Բնականաբար, այնտեղ, որտեղ տեսախցիկ չկա: Օրինակ՝ Իսակովի պողոտայում գրեթե մեկ տարի առաջ հայտնվել է լուսացույց, որպեսզի կրճատվի ՃՏՊ-ների թիվը: ՃՏՊ-ների թիվը չի նվազել, ամեն օր կարելի է նկատել, թե ինչպես են շտապողները «սահում» կարմիր լույսի տակ:
Կրկնենք՝ ամենուր, որտեղ չկա տեսախցիկ, կարելի է նկատել ամեն տեսակի խախտում: Հաճախ կարելի է տեսնել, թե ինչպես է միանգամից մի քանի մեքենա հանդիպակաց ճանապարհով ընթանում:
Տեսանյութում ավտոմեքենայի վարորդը «հերոսաբար» առաջ է անցնում այլ ավտոմեքենաներից հանդիպակաց ճանապարհով հետիոտնային անցման մոտ: Հուսով ենք, որ ոստիկանությունն ուշադրություն կդարձնի այս հրապարակմանն ու հետեւողական կլինի խախտողներին պատասխանատվության ենթարկելու հարցում: Թող սա դաս լինի վարորդներին:
