Վստահ եմ, որ եթե վարչապետը նման բան է ասել, ուրեմն՝ փաստ կա։ Այս մասին այսօր՝ մարտի 2-ին, NEWS.am-ի հետ զրույցում ասաց «Իմ քայլը» խմբակցության պատգամավոր Թագուհի Ղազարյանը՝ անդրադառնալով Փաշինյանի այն հայտարարությանը, որ Գլխավոր շտաբի հայտարարությունն արվել է Սերժ Սարգսյանի դրդմամբ։
«Ես կարծում եմ՝ կարելի է ծառայողական քննություն կամ այլ տիպի հետաքննություն անցկացնել։ Ես քաղաքականապես մոտիվացված եմ հիմա ասելու, որ վարչապետին վստահում եմ, և վարչապետի ասածները միշտ ճիշտ են դուրս գալիս»,- նշեց Ղազարյանը։
Թագուհի Ղազարյանի խոսքով՝ Գլխավոր շտաբից որևէ մեկը սխալ է զեկուցել Փաշինյանին «Իսկանդերի» անարդյունավետության մասին։
«Վարչապետն «Իսկանդերի» մասին դիրքորոշումը չի փոխել , ճշմարտության մասին խոսվել է առ այն, որ վարչապետին Գլխավոր շտաբն այդ հարցում սխալ է զեկուցել և հնարավոր է, որ հենց դա է, որ Տիրան Խաչատրյանը շարունակում է մնալ ազատված։ Այսինքն ՝ ինչ-որ մեկը կա Գլխավոր շտաբում մեղավոր, որ վարչապետին ինչ-որ բան սխալ է զեկուցվել»։
