Volvo Cars ընկերությունը հայտարարել է մինչ 2030 թվականը միայն էլեկտրական մեքենաներ արտադրելու մտադրության մասին: Այս պահի դրությամբ ավտոարտադրողի պորտֆելը այլեւս չի ունենա ներքին այրման շարժիչներով մեքենաներ, ներառյալ հիբրիդներ, նշվում է կոնցեռնի երեքշաբթի հրապարակած մամուլի հաղորդագրության մեջ:
«Ներքին այրման շարժիչով աշխատող տրանսպորտային միջոցները երկարաժամկետ ապագա չունեն»,- հաղորդագրության մեջ պարզաբանել է տեխնիկական տնօրեն Հենրիկ Գրինը: «Մենք վճռականորեն մտադիր ենք դառնալ էլեկտրամոբիլների արտադրող, եւ այդ անցումը պետք է տեղի ունենա մինչեւ 2030 թվականը: Դա մեզ հնարավորություն կտա արդարացնել մեր հաճախորդների սպասելիքները եւ դառնալ լուծման մի մաս, երբ խոսքը վերաբերում է կլիմայի փոփոխության դեմ պայքարին»:
Ընկերությունը նշում է, թե իր որոշման մեջ ելնում է նաեւ այն փաստից, որ օրենսդրությունը եւ մարտկոցների լիցքավորման բարձրորակ ենթակառուցվածքի արագ զարգացումը կնպաստեն նաեւ սպառողների կողմից էլեկտրական մեքենաների ավելի լայն ընդունմանը: Ավտոարտադրողի քայլը դեպի իր մոդելների ամբողջական էլեկտրաֆիկացում համացանցում վաճառքների վրա ուշադրության կենտրոնացմանը զուգընթաց է տեղի ունենում՝ բոլոր 100%անոց էլեկտրամոբիլները հասանելի կլինեն միայն առցանց:
Անցյալ տարի Volvo Cars-ը ներկայացրեց իր առաջին ամբողջովին էլեկտրական XC40 Recharge-ը, իսկ երեքշաբթի օրը ընկերությունը կներկայացնի 40-րդ սերիայի իր երկրորդ 100%-անոց էլեկտրական մոդելը: Առաջիկա տարիներին ընկերությունը կստեղծի նոր էլեկտրամոբիլներ: Ավտոարտադրողի գնահատմամբ, մինչ 2025 թվականը համաշխարհային վաճառքի 50%-ը բաժին կընկնի ամբողջովին էլեկտրական ավոմեքենաներին, իսկ մնացածը` հիբրիդներին:
