Որքա՞ն կարելի է մերժել Սերժին, 2018թ.–ից ամբողջ ազգը ելավ ու մերժեց ու արդեն 2021թվականն է դեռ մերժում ենք։ Այս մասին այսօր՝ մարտի 2–ին, խորհրդարանում հայտարարությունների ժամանակ հայտարարեց անկախ պատգամավոր Սոֆյա Հովսեփյանը։

«Որքան պետք է չհասկանանք, որ այլեւս մերժելուց հետո իշխանություն գոյություն ունի։ Հիմա հնարավորություն է ստեղծվել եւ ես կողքից եմ նայում. երկրում կա ընդդիմություն եւ էլի ընդդիմություն, իշխանություն գոյություն չունի, մեկը մյուսին է մերժում։ Որ ըննդիմությունը քննադատում է՝ դա  նորմալ է, բայց որ իշխանությունն է քննադատում՝ չեմ հասկանում, որովհետեւ այնքան էներգիան, որը դրվում է քննադատության վրա, պետք է դրվեր աշխատանքի մեջ։ Վստահեցնում եմ, որ եթե  այդքան էներգիան ներդրվեր  գործի մեջ, ապա ընդդիմության քննադատությունը կնվազեր»,–  ասաց նա։

Ըստ Սոֆյա Հովսեփյանի՝ իշխանությունը պետք է համախմբի մարդկանց, ոչ թե պառակտի։ 

«Այսօր մեր ազգը պառակտված է, մարդիկ իրար ատում են, ընտանիքներ են բաժանվում, ընտանիքի մի մասը Բաղրամյան պողոտայում է, մյուսը՝ Հանրապետության հրապարակում։ Ես կողքից նայելով, ազնվությամբ եմ ասում՝ ցավ եմ ապրում։ Ե՛վ որպես գործընկեր, եւ՛ որպես քաղաքացի,  ուղղակի խնդրանքս է՝ եկեք բոլորին համախմբենք, ինքս պատրաստ եմ ամեն հարցում աջակցել, որովհետեւ մենք այլեւս ազգակործանման ճանապարհն ենք ընտրել, միգուցե իներցիոն կերպով գնում ենք ու դա չենք գիտակցում, բայց մի պահ դուրս եկեք, պարտադիր չէ խմբակցությունից, ու կողքից նայեք, մենք խնդրի առաջ ենք կանգնել, իսկ դրա միակ լուծումը պետք է լինի իշխանության կողմից համախմբման  քայլեր կատարելը եւ աջ ու ձախ դավաճաններ չփնտրելը»,– հավելեց նա։