Շատ մոտ ապագայում մենք կծանոթացնենք ձեզ մի ռուսական մարդասիրական նախաձեռնության հետ Արցախում, որի մասին ես հիմա ժամանակից շուտ եմ հայտարարում: Այս մասին մարտի 3-ին տեսակամրջի ժամանակ ասաց Պետդումայի ԱՊՀ գործերի եւ հայրենակիցների հետ կապի հանձնաժողովի անդամ, պատգամավոր Կոնստանտին Զատուլինը:
Նա նշեց, որ Հայաստանում անկախության ձեռք բերումից ի վեր ազդեցիկ խմբեր կան, որոնք ամեն կերպ բազմավեկտորության կամ նույնիսկ դեպի Արևմուտք վերակողմնորոշման գաղափար են քարոզում: Նրա խոսքով` լավագույն պատասխանը դրան ռուս խաղաղապահների ներկայությունն է Ղարաբաղում:
«Բացի այդ, ես հանդիպում եմ շատ մարդկանց, ովքեր լրջորեն ասում են, որ կցանկանային, որպեսզի Լեռնային Ղարաբաղը Ռուսաստանի մաս դառնա: Իհարկե, դա ֆանտազիա է, եւ դա չի իրականացվի սկզբունքային եւ կոնկրետ քաղաքական պատճառներով: Բացի այդ, ներկայումս Լեռնային Ղարաբաղում քննարկվում է ռուսաց լեզվին երկրորդ պետական լեզվի կարգավիճակ շնորհելու հարցը: Դա վկայում է այն մասին, որ Ռուսաստանն իր գործողություններով մեծացրել է ազդեցությունը»,- ընդգծեց Զատուլինը:
Պատգամավորը հույս հայտնեց, որ դա տեղի կունենա ոչ միայն ռուսական խաղաղապահ զորախմբի առկայության, այլ նաեւ հետագա գործողությունների հաշվին, այդ թվում` հումանիտար ոլորտում:
