Տոմսկի բարերից մեկում հայերի վրա հարձակված ադրբեջանցիների դեմ քրեական գործ է հարուցվել Ռուսաստանի Քրեական օրենսգրքի միանգամիրց 2 հոդվածով (ազգամիջյան երկպառակության հրահրում եւ ծեծ): Այս մասին մարտի 8-ին NEWS.am-ի հետ զրույցում ասաց Ռուսաստանի հայերի միության փոխնախագահ Գերման Անանյանցը:
Նրա պարզաբանմամբ՝ միջադեպը, որի կադրերը վերջերս են հայտնվել, տեղի է ունեցել նվազագույնը 2 շաբաթ առաջ:
Գերման Անանյանցի խոսքով՝ ադրբեջանցիների հարձակման հետեւանքով երեք հայեր հայտնվել են հիվանդանոցում, նրանք հիմա արդեն տանն են:
«Ծեծկռտուքի ժամանակ ադրբեջանցիներն իրենց թույլ են տվել ազգայնական, հակահայկական բնույթի բղավոցներ՝ հայերից պահանջելով լքել բարը: Այժմ ադրբեջանցիներից մեկը կալանավորվել է եւ քննչական մարմնին ցուցմունք է տալիս, եւս մեկը հետախուզման մեջ է: Վերջինին, համոզված եմ, շուտով կգտնեն: Ծեծկռտուքի բոլոր մասնակիցները Ռուսաստանի քաղաքացիներ են»,- ասաց Գերման Անանյանցը:
Նա շեշտեց, որ իրավիճակը ոչ միայն դատախազության վերահսկողության տակ է, այլեւ Ռուսաստանի հայերի միության Տոմսկի մարզի տարածաշրջանային բաժանմունքի նախագահի, որը նախկինում ՆԳՆ գնդապետ է եղել:
«Տեղական իշխանություններն ամբողջությամբ մեզ են աջակցում: Այս գործընթացը կհասցվի մինչեւ վերջ»,- հավաստիացրեց Անանյանցը: