Facebook-ի եւ Google-ի լոբբիստները դեմ են ԱՄՆ նոր օրենսդրությանը, որը նպատակ ունի օգնել նորությունների հրատարակիչներին՝ թույլ տալով նրանց կոլեկտիվ բանակցություններ վարել տեխնոլոգիական ընկերությունների դեմ եկամտի բաժանման եւ այլ գործարքների հարցերով, փոխանցում է Reuters-ը:
ԱՄՆ օրենսդիրներն օրինագիծ են ներկայացրել Կոնգրեսին՝ լրատվական գործակալությունների եւ տեխնոլոգիական հսկաների միջեւ ենթադրվող անհավասարակշռության վերացման համար: Քննադատներն ընկերություններին մեղադրում են հարթակներում տրաֆիկն ու գովազդային եկամուտներն ավելացնելու նպատակով քոնթենթի օգտագործման մեջ՝ առանց հրատարակիչներին արդարացի փոխհատուցում տրամադրելու:
Այս քայլը մեծացնում է ճնշումը տեխնոլոգիական ընկերությունների վրա, որոնք հակամենաշնորհային դատական հայցերի եւ կարգավորման ավելացման սպառնալիքի են բախվում:
Google-ը, որը հրաժարվել է մեկնաբանել առաջարկը, գործարկել է իր https://blog.google/supportingnews#overview կայքը՝ հայտարարելով, որ այն «լրագրության ամենամեծ ֆինանսական հովանավորներից մեկն է»՝ գովազդից եկամտի եւ քոնթենթի համար լիցենզավորված վճարների շնորհիվ: Google-ը հայտարարել է, որ իր որոնողական համակարգն ամսական 24 միլիարդ անգամ ընթերցողներին հրատարակիչների կայքեր է ուղարկում:
Օրինագծին դեմ են նաեւ տեխնոլոգիական արդյունաբերության երկու առեւտրային խմբերը, որոնց թվում են նաեւ Facebook-ը եւ Google-ը՝ Կապի արդյունաբերության ասոցիացիան (CCIA) եւ NetChoice-ը:
Ոլորտի որոշ մասնագետներ ասում են, որ առաջարկը կարող է անհամաչափ օգուտ բերել մասնավոր բաժնետիրական ընկերություններին եւ հեջ ֆոնդերին, որոնք գրավել են միջին եւ խոշոր թերթերի ցանցերը: Այնպիսի թերթերը, ինչպիսիք են Chicago Tribune-ը եւ Miami Herald-ը, վերահսկվում են այնպիսի ընկերությունների կողմից, ինչպիսիք են Alden Global Capital-ը եւ Chatham Asset Management-ը:
Սենատոր Էմի Քլոբուչարը, ով նախագիծը ներկայացրել է Սենատում, ասել է, որ Ավստրալիայում տիրող իրավիճակը վկայում է Facebook-ի չափազանց մեծ ազդեցության եւ հրատարակիչներին ավելի մեծ լծակներ տալու անհրաժեշտության մասին: «Մենք պետք է հավասար պայմաններ ունենանք, եւ մարդիկ պետք է բանակցեն»,- ասել է նա:
Տեխնոլոգիական պլատֆորմները, կարծես, քիչ ընկերներ ունեն Կոնգրեսում, որտեղ դեմոկրատները վրդովված են ապատեղեկատվությունից համացանցում, իսկ պահպանողականները պնդում են, որ իրենց նեղում են:
