2020-ին արտասահմանյան ուղիղ ներդրումների զուտ ներհոսքը Հայաստան կրճատվել է 11 անգամ, 2019-ին՝ 2,5 անգամ: Այս մասին այսօր՝ մարտի 19-ին, «Հայ-ռուսական ռազմավարական միության արդիական հիմնախնդիրները ժամանակակից սպառնալիքների եւ մարտահրավերների առջեւ» թեմայով քննարկման ժամանակ ասաց ԱԺ տարածաշրջանային եւ եվրասիական ինտեգրման հարցերի մշտական հանձնաժողովի նախագահ, «Բարգավաճ Հայաստանի» պատգամավոր Միքայել Մելքումյանը:
Նա հավելեց, որ 2020-ին Հայաստանի արտաքին առեւտրաշրջանառությունը կազմել է 7,1 մլրդ դոլար, նախորդ տարվա նույն ժամանակահատվածի համեմատ այդ ցուցանիշը նվազել է 13,2 տոկոսով (2019-ին՝ 8,2 մլրդ դոլար):
«Հայաստանի արտաքին առեւտրաշրջանառությունը ԵԱՏՄ անդամ երկրների հետ կազմել է 2,2 մլրդ դոլար, նախորդ տարվա նույն ժամանակահատվածի համեմատ նվազել է 2,6 տոկոսով: 2020-ի հունվար-դեկտեմբեր ամիսներին Հայաստանից արտահանումը կազմել է 2,5 մլրդ դոլար, նախորդ տարվա նույն ժամանակահատվածի համեմատ ցուցանիշը նվազել է 3,9 տոկոսով (2019-ին ՝ 2,6 մլրդ դոլար):
Հայաստանից ԵԱՏՄ անդամ երկրներ արտահանումը կազմել է 705,3 մլն դոլար, նախորդ տարվա նույն ժամանակահատվածի համեմատ ցուցանիշը նվազել է 8,3 տոկոսով (2019-ին՝ 769,2 մլն դոլար): Հայաստան ներմուծումը 2020 թվականի հունվար-դեկտեմբեր ամիսներին, ըստ ապրանքների ծագման երկրի, կազմել է 4,6 մլրդ դոլար: Այդ ցուցանիշը նախորդ տարվա նույն ժամանակահատվածի համեմատ նվազել է 17,7 տոկոսով (2019-ին ՝ 5,5 մլրդ դոլար): ԵԱՏՄ անդամ երկրներից Հայաստան ներմուծումը կազմել է 1,5 մլրդ դոլար, նախորդ տարվա նույն ժամանակահատվածի համեմատ ցուցանիշն աճել է 0,2 տոկոսով»,-ասաց պատգամավորը:
