Երուսաղեմի քրիստոնեական եկեղեցիների առաջնորդները մտահոգված են եկեղեցիների անշարժ գույքի վրա դրված հարկային պարտավորություններում նոր փոփոխություններ մտցնելու իսրայելական իշխանությունների նախաձեռնության կապակցությամբ: Այդ մասին գրում է «Nouvelles d`Arménie» պարբերականը:
Թեեւ նախորդ փոփոխությունները ձախողվել են, սակայն իսրայելցիները չէին թաքցնում տարբեր եկեղեցիների անշարժ գույքը հարկելու մտադրությունը: Փոփոխությունները վերաբերելու են նաեւ դատարկ, ժամանակավորապես չօգտագործվող եկեղեցական շինություններին:
Իսրայելի կողմից ճանաչված քրիստոնեական եկեղեցիների «Երուսաղեմի Սուրբ քաղաքի Եկեղեցիների առաջնորդների» ոչ պաշտոնական խումբը զգուշացրել է այդ նախագծի իրագործման բացասական հետեւանքների մասին:
Երուսաղեմում եկեղեցիների առաջնորդներն են հույն ուղղափառ պատրիարքը, լատինական պատրիարքը, հայ պատրիարքը, նաեւ հայ կաթոլիկների, ուղղափառ ղպտիների, եթովպիական ուղղափառների, հույն կաթոլիկների, մարոնիտների, սիրիական ուղղափառ, անգլիկան եւ լյութերանական արքեպիսկոպոսներն ու եպիսկոպոսները:
