Իշխող «Իմ քայլը» դաշինքը Ընտրական օրենսգրքում փոփոխություններ է նախաձեռնում: Այս մասին մարտի 24-ին Ազգային ժողովի նիստում ասաց վարչապետ Նիկոլ Փաշինյանը՝ պատասխանելով պատգամավորների հարցերին:
Վարչապետի խոսքով՝ խորհրդարանական ուժերը համաձայնության են եկել արտահերթ խորհրդարանական ընտրություններ անցկացնելու շուրջ, սակայն ոչ Ընտրական օրենսգրքի շուրջ:
«Բայց բոլոր, այդ թվում խորհրդարանական քննարկումների ժամանակ ես հարցրել եմ ընտրական համակարգի վերաբերյալ մեր գործընկերների կարծիքը՝ նրանք արդյոք ռեյտինգային համակարգ են ուզո՞ւմ, թե՞ ոչ: Մեր բանակցությունների ժամանակ մենք գրանցել ենք, որ «Բարգավաճ Հայաստանը» եւ «Լուսավոր Հայաստանը» այդ հարցը թողնում են խորհրդարանական մեծամասնության հայեցողությանը»,- ասաց Փաշինյանը:
Վարչապետը հավելեց նաեւ, որ «Իմ քայլը» արտախորհրդարանական ուժերի, քաղաքացիական հաարակության ներկայացուցիչների հետ բանակցություններ վարելով եւ հաշվի առնելով անցյալում իր ստանձնած պարտավորությունները, որոշել է, որ անհրաժեշտ է գնալ Ընտրական օրենսգրքի պարզ փոփոխությունների:
«Եվ ընտրությունները կանցկացվեն համամասնական ընտրակարգով՝ առանց ռեյտինգայինի»,- պարզաբանեց Փաշինյանը: