Ռուսերենն Արցախում պաշտոնական լեզի կարգավիճակ է ստացել: Այս մասին այսօր՝ մարտի 25-ին, NEWS.am-ի հետ զրույցում հայտնեց Արցախի ԱԺ Գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ Արամ Հարությունյանից, ով նաև նախագծի համահեղինակներից մեկն է:
Նա ընդգծեց, որ խոսքը ռուսերենին երկրորդ պաշտոնական լեզվի կարգավիճակ տալու մասին է, իսկ Արցախի պետական միակ լեզուն շարունակում մնալ հայերենը:
«Նիստին 33 պատգամավորից 31–ն էին ներկա։ 27 պատգամավոր կողմ է քվեարկել, երկու պատգամավոր չեն քվեարկել, որից մեկը «Արդարություն» խմբակցության պատգամավոր Մետաքսե Հակոբյանն է, որը նախագծի համահեղինակ էր, բայց հրաժարվել էր դրանից, մյուսն էլ «Արցախի ժողովրդավարական կուսակցություն» խմբակցության պատգամավորը։ Իսկ «Հայ հեղափոխական դաշնակցություն» խմբակցության երկու պատգամավորները ձեռնպահ են քվեարկել, իսկ մյուսն էլ ներկա չէր նիստին»,– ասաց նա։
Հիշեցնենք, որ նախորդ ամիս Արցախի ԱԺ պատգամավորներ նախագիծ էին մշակել, ըստ որի, առաջարկվում էր ռուսերենին պաշտոնական լեզվի կարգավիճակ տալ Արցախում: Սա բուռն քննարկումների առիթ էր դարձել թե Հայաստանում, թե Արցախում: Նախաձեռնության հեղինակները հավաստիացնում էին, որ ռուսական կողմից պարտադրանք չի եղել: