Կոկորդիլոսները գոյություն են ունեցել դինոզավրերի ժամանակաշրջանում, եւ, ի տարբերություն վերջիններիս, նրանք կարողացել են գոյատեւել մինչ օրս: Բրիստոլի համալսարանի (Մեծ Բրիտանիա) գիտնականները վստահ են, որ կոկորդիլոսների գոյատեւմանը նպաստել է արագ էվոլյուցիան, հայտնում է Planet- Today-ը:
Բրիտանացի գիտնականներն ուսումնասիրել են հին կոկորդիլոսների ու նրանց մերձավոր ազգականների ավելի քան երկու հարյուր գանգեր ու ծնոտներ: Ծրագրի շրջանակներում ուսումնասիրվել է կոկորդիլոսների տեսակային բազմազանությունը, ինչպես նաեւ այն գործոնները, որոնք թույլ են տվել եզրակացություններ անել այդ արարածների էվոլյուցիայի տեմպի վերաբերյալ:
«Տալատտոզուխի կոկորդիլոսները, որոնք դինոզավրերի ժամանակ ապրել են օվկիանոսներում, հիշեցրել են ժամանակակից դելֆիններին, իսկ ցամաքային նոտոզուխի կոկորդիլոսները խոտակեր արարածներ են եղել, որոնք բավականին արագ են վազել: Տարբեր էկոլոգիական խորշերը ծածկելու համար կոկորդիլոսները արագ էվոլյուցիայի պատճառով ստիպված են եղել զգալի կենսաբանական փոփոխություններ տանել»,- պատմում են նախագծի հեղինակները` նշելով, որ հին կոկորդիլոսները զբաղեցրել են էկոլոգիական տեղերը, որոնք այժմ զբաղեցնում են, օրինակ, կաթնասուները:
«Այսօր Երկրի վրա կոկորդիլոսի ընդամենը 26 տեսակներ կան, որոնք ընդհանուր առմամբ բավականին նման են: Բայց միշտ չէ, որ այդպես է եղել: Հին ժամանակներում կոկորդիլոսի հարյուրավոր տեսակներ են եղել, եւ նրանց մեջ՝ շատ տարբեր արարածներ: Արագ էվոլյուցիան օգնել է կոկորդիլոսներին դինոզավրերից ավելի երկար գոյատեւել, եւ այսօր մենք կոկորդիլոսների էվոլյուցիայի դանդաղման ուրեւէ ապացույց չունենք, ուստի դրանք չեն կարող համարվել կենդանի բրածոներ»,- ասել է Թոմ Սթաբսը՝ Բրիստոլի համալսարանի Երկրի մասին գիտությունների դպրոցից: