Ջաբրայիլի Սուրբ Աստվածածին եկեղեցին, որն ադրբեջանցիները հողին են հավասարեցրել, կառուցվել էր մի քանի տարի առաջ զինվորների օգնությամբ։
2012թ․ եկեղեցու կառուցման գաղափարն առաջացել էր Մեխակավանի զորամասի հոգևոր հովիվ Տեր Գևորգ քահանա Աբյանի մոտ։ Եկեղեցին օծվել էր 2017 թվականին։
«Եկեղեցին բլրի վրայից ոնց որ հովանավորեր զորամասի ողջ տարածքը։ Կառուցման ընթացքում և զինվորները, և սպաները միահամառու ուժերով աշխատում էին եկեղեցու կառուցման համար։ Ամեն մի փոքր հայթայթված թե գումար, թե միջոց, թե շինանյութ, ամեն ինչ ներ էինք դնում եկեղեցու կառուցման համար։ Ամեն մի քարը, մասնիկն ամենայն սրտացավությամբ դրել ենք»,- NEWS.am-ի հետ զրուցում նշեց Տեր Գևորգը։
.jpg)
Նշենք, որ պատերազմի օրերին պղծել էին ադբեջանցի զինվորները՝ գմբեթին կանգնած «Ալլահու Ակբար» գոռալով։
Նշենք, որ սա Ադրբեջանի վարած մշակութասպան քաղաքականության միակ օրինակը չէ։ Օրեր առաջ էլ տարածվեց արբանյակի լուսանկար, որում երևում էր, որ պատերազմից հետո ավերվել է Շուշիի «Կանաչ ժամ» եկեղեցին։
«Իրենց ձեռքի տակ ինչ կա քրիստոնեական, իրենք հավասարեցնում են զրոյի, ոչնչացնում են հետքերը, բայց բարձր ամբիոններից խոսում են իրենց նախնիների քրիստոնյա լինելու, հոգևոր մշակութային արժեքները պահպանելու մասին։ Խոսելը հեշտ է, գործն անում են այն , ինչ անում են՝ քանդել ավերել»,- NEWS.am-ի հետ զրույցում նշեց Արցախի թեմի առաջնորդ Վրթանես Սրբազանը։
Շուշին գրավելուց անմիջապես հետո էլ ադրբեջանցիները պղծել էին Սուրբ Ղազանչեցոց եկեղեցին։
Պատերազմի ընթացքում ադրբեջանական վերահսկողության տակ անցած տարածքներում տասնյակ հայկական եկեղեցիներ ու վանքեր են մնացել։ Դրանց բոլորի ճակատագիրը վտանգված է։
Հիշեցնենք, որ բրիտանական BBC-ն այցելել էր Ջաբրայիլ ու պարզել, որ եկեղեցուց անգամ փլատակներ չեն մնացել, այն հիմնահատակ ավերվել է։
