2021 թվականին մարզում ներդրումների ծավալը 44 միլիարդ դրամ (նախորդ տարվա ցուցանիշներից 32 տոկոսով ավել) կկազմի, որից մասնավոր ներդրումները 7 միլիարդ դրամ կկազմեն: Այս մասին մարտի 26-ին լրագրողների հետ զրույցում ասաց Տավուշի մարզպետ Հայկ Չոբանյանը:
Նա հավելեց, որ 2020 թվականին, չնայած կորոնավիրուսին, նաեւ ներդրումային ծրագրեր են իրականացվել, մասնավորապես, մի քանի տեքստիլ ձեռնարկություն է բացվել:
«Այս տարի նախատեսվում է ծրագրեր իրականացնել գյուղատնտեսության, զբոսաշրջության, արդյունաբերության եւ այլ ոլորտներում:
2021 թվականին ոռոգման համակարգի զարգացման ծրագրեր կիրականացվեն: Դա վերաբերում է նաեւ Ադրբեջանի հետ սահմանին գտնվող ջրամբարների ջրային ռեսուրսների օգտագործմանը»,- ասաց մարզպետը:
Մարզում, ըստ նրա, գյուղատնտեսական նշանակության հողերի շատ փոքր մասն է օգտագործվում, եւ ընդամենը 4500 հա տարածք է ոռոգվում: Չոբանյանը պարզաբանեց, որ եթե մոտ 5000 հա տարածք ոռոգվի, ապա դա մոտ 10 միլիարդ դրամի չափով ներդրումներ կներգրավի:
«Մարզից միգրացիա չկա: Այս կապակցությամբ մենք կարեւորում ենք շինարարության ոլորտը: Անցյալ տարի հուլիսյան դեպքերից հետո ավերածությունները վերականգնելու ծրագրերում ներգրավված աշխատուժի 70 տոկոսն այն մարդկիկ էին, ովքեր ավանդաբար սեզոնային աշխատանքների են մեկնում: Շինարարական ծրագրեր իրականացնելիս կշարունակվի շեշտադրումն այդ մարդկանց վրա»,- եզրափակեց նա:
Նշենք, որ տարածքի մի զգալի մասը չի օգտագործվում այն պատճառով, որ գտնվում է սահմանին, եւ հակառակորդը պարբերաբար կրակում է դրանց ուղղությամբ: