Եթե արտաքին գործերի նախարարությունը տեղյակ չէ, ուրեմն՝ Թուրքիայի հետ բանակցություններ գոյություն չունեն. որեւէ ձեւաչափով բանակցություններ այսօր չկան։ Այս մասին այսօր՝ մարտի 29-ին, ԱԺ-ում լրագրողների հետ ճեպազրույցում ասաց ՀՀ արտաքին գործերի նախարար Արա Այվազյանը։
Հարցին՝ այդ դեպքում ԱԽ քարտուղարն ինչի մասին է խոսում, երբ ասում է՝ Թուրքիայի հետ մոտեցումներում պետք է որոշակի շտկումներ անել, Այվազյանը չմեկնաբանեց՝ խնդրելով այդ հարցն ուղղել ԱԽ քարտուղարին։
Հարցին՝ այն իշխանությունը, որի քաղաքականությունը բերեց պատերազմի աղետալի հետեւանքների, կան գերիներ, ու այդ հարցը դեռ չլուծված՝ կարո՞ղ են նման շտկումներ անել, Այվազյանն արձագանքեց, թե այդ գնահատականների հետ համաձայն չէ։ «Առաջին քայլը պետք է լինի գերիների եւ հումանիտար այս կարեւոր հարցի շուտափույթ լուծումը՝ առանց որեւէ նախապայմանի»,-նշեց նա։
Դիտարկմանը, թե պատերազմի ընթացքում Իսրայելում ՀՀ դեսպանը հետ է կանչվել, եւ հարցին՝ նրա վերաբերյալ որեւէ որոշում այժմ կա՞, Արա Այվազյանն արձագանքեց․ «Ես պատերազմի ժամանակ ԱԳ նախարար չեմ եղել»։
