Ակնհայտ է, որ դատախազները վախեցել են ներկայանալ այսօրվա դատական նիստին: Նման կարծիք հայտնեց ՀՀ երկրորդ նախագահ Ռոբերտ Քոչարյանի փաստաբան Արամ Վարդեւանյանը լրագրողների հետ զրույցում փաստացի դատախազների մեղքով չկայացած դատական նիստից հետո:
«Դատախազները, ովքեր մշտապես հայտարարում էին, որ գործընթացը ձգձգվում է, այսօր չներկայացան նիստին: Դատախազությունում ոչ մի դատախազ չգտնվեց: Դա պայմանավորված է նրանով, որ նրանք վախեցան: Այլ տրամաբանություն չկա»,-նշեց փաստաբանը:
Խոսելով ՍԴ դատավորների ձայների բաշխման մասին՝ Վարդեւանյանը հաստատեց, որ որոշումը փաստացի միաձայն է եղել: Միայն դատավոր Խունդկարյանն է հատուկ կարծիք հայտնել, այն էլ եզրափակիչ մասով:
«Յուրի Խաչատուրովի եւ Սեյրան Օհանյանի նկատմամբ քրեական հետապնդումն անօրինական է: Դատախազները կարող էին գալ եւ ասել, որ միջնորդություն են պատրաստում: Սակայն վախենալը խայտառակություն է»,-ասաց Վարդեւանյանը:
Պատասխանելով մեղադրանքի վերաորակավորման հնարավորության մասին հարցին, փաստաբանը նկատեց, որ նման ենթադրությունը ժպիտ է առաջացնում: «ՔՕ-ն միանշանակ ենթադրում է, որ վերաորակավորման մասին խոսել կարելի է միայն նոր փաստացի տվյալների առկայության դեպքում»,-նկատեց փաստաբանը՝ ասելով, որ նման ենթադրությունը ցույց է տալիս քննության համար ոչ կոմպետենտությունն ու վիրավորանքը: Միեւնույն ժամանակ, նա խորհուրդ տվեց ուսումնասիրել ավելի վաղ փաստաբան Էրիկ Ալեքսանյանի կողմից արված հայտարարությունը 308-րդ եւ 309-րդ հոդվածների վերաորակավորման հարցով, եւ դատախազ Գեւորգ Բաղդասարյանի արձագանքը: «Նա ինձնից լավ բացատրել է, թե ինչու է դա անհնար, քանի որ 300.1-րդ հոդվածը պարունակում է այլ հոդվածների բոլոր տարրերը: Իրականում հոդվածը խայտառակ անորոշ է: Մենք առաջին օրվանից խոսել ենք անօրինականության մասին»,-նշեց փաստաբանը:
