Սուեզի ջրանցքում «Ever Given» կենտեյներատարի հետ կապված պատահարը ոչ մի ձեւով չի անդրադառնա ԵՏՄ երկրների վրա, որովհետեւ տարանցիկ հոսքը ընթացել է մեզ շրջանցելով: Այս մասին ապրիլի 1-ին Մոսկվա-Բիշքեկ-Մինսկ-Երեւան-Նուր Սուլթան տեսակամուրջի ժամանակ ասաց Եվրասիական տնտեսական հանձնաժողովի ինտեգրման եւ մակրոտնտեսության կոլեգիայի անդամ (նախարար), տնտեսագիտության դոկտոր Սերգեյ Գլազեւը:
Նրա խոսքով՝ այս տխուր պատահարը հաստատել է ցամաքային ճանապարհների կարեւորությունը:
«Այսօր մենք պայմաններ ենք ստեղծում կոնտեյներային փոխադրումների համար: Առաջին հերթին աշխատանք է կատարվել երկաթուղային տրանսպորտի նեղ հատվածների վերացման համար: Այսօր կենտրոնական Չինաստանից մինչեւ կենտրոնական Ռուսաստան գնացքի շարժման արագությունը կազմում է շուրջ 10 օր:
Եթե երկաթուղագործները սակագները չբարձրացնեն, ապա համոզված եմ, որ այդ պատահարը հզորագույն խթան կդառնա կոնտեյներային բեռների հոսքը նավերից գնացքներ վերաուղղորդելու համար: Արդեն այս տարի տեսնում ենք նման փոխադրումների կրկնապատկում»,- նշել է նա:
Գլազեւը հավելել է, որ դրա հետ մեկտեղ համավարակի պատճառով ծովային սակագներն աճել են, ինչը հանգեցրել է երկաթուղային փոխադրումների հանդեպ հետաքրքրության լրացուցիչ մեծացման:
Հիշեցնենք, որ մարտի 23-ին «Ever Given» կոնտեյներատարը ծանծաղուտի մեջ էր խրվել Սուեզի ջրանցքի ամենանեղ հատվածում՝ երկար ժամանակով ամբողջությամբ փակելով այս կարեւորագույն ջրային մայրուղին: