Դատարանը քննարկում է ՔՕ 300.1 հոդվածով Հայաստանի երկրորդ նախագահ Ռոբերտ Քոչարյանի եւ մյուսների հետապնդումը դադարեցնելու հարցը:
Համապատասխան միջնորդությունը ներկայացրել են փաստաբանները:
Սա արդեն երկրորդ դատական նիստն է Սահմանադրական դատարանի որոշումից հետո, որը ՔՕ 300.1-րդ հոդվածը ՀՀ Սահմանադրության 78 եւ 79-րդ հոդվածներին հակասող եւ անվավեր էր ճանաչել: Մարտի 25-ին ՍԴ-ն հրապարակել էր որոշման եզրափակիչ մասը, իսկ մարտի 29-ի երեկոյան՝ 42-էջանոց լրիվ տեքստը: ՍԴ որոշումը վերջնական է եւ ենթակա չէ բողոքարկման: ՍԴ-ն 300.1 հոդվածը համարել էր անորոշ իրավունքի եւ մեղսագրվող արարքի տեսակետից, պարզ չէ, թե ինչ կարգի տապալման մասին է խոսքը՝ հաշվի առնելով, որ հոդվածն ընդունվել է մի Սահմանադրությամբ, իսկ փորձել են կիրառել մեկ այլ Սահմանադրությամբ: Ռոբերտ Քոչարյանը, Յուրի Խաչատուրովը, Սեյրան Օհանյանը եւ Արմեն Գեւորգյանը մեղադրվում են հենց այդ հոդվածով՝ սահմանադրական կարգի տապալում: Փաստացի, դատարանը պետք է դադարեցնի այդ հոդվածով քրեական հետապնդումը վերը թվարկված անձանց, ինչպես նաեւ նմանատիպ մեղադրանքով այդ գործի շրջանակում անձանց նկատմամբ:
Չնայած դրան՝ մարտի 30-ի նիստում դատավոր Դանիբեկյանը հրաժարվել էր դադարեցնել քրեական հետապնդումը եւ նիստը հետաձգել դատախազների բացակայության պատճառով:
Հայտարարելով փաստաբանների միջնորդության քննարկման մասին՝ դատավոր Դանիբեկյանը հանկարծ մոռացավ նրանց մասին եւ դատախազներին դիմեց հարցով, թե ի՞նչ միջնորդություն են ներկայացնելու: Դատախազ Գեւորգ Բաղդասարյանը հայտնեց, որ խոսքը Սահմանադրության մի քանի նորմերի անհամապատասխանության ու ՍԴ դիմելու մասին է եւ խնդրեց հնարավորություն տալ իր միջնորդությունը ներկայացնել փաստաբանների միջնորդություններից հետո՝ խորհրդակցական սենյակում միաժամանակ քննելու համար:
Դատավորը ընդմիջում հայտարարեց, որ պաշտպանական կողմին տրամադրի դատախազության միջնորդությունը: Որքա՞ն ժամանակով՝ փորձեցին պարզել փաստաբանները: Որքան պահանջվի՝ նրանց խոսքը կտրեց դատավորը: