Երկար ընդմիջումից հետո վերադառնալով՝ դատավոր Աննա Դանիբեկյանը սկսեց կարծիքներ հարցնել Յուրի Խաչատուրովի եւ Սեյրան Օհանյանի, ինչպես նաեւ նրանց փաստաբանների բացակայության վերաբերյալ:
Դատախազ Գեւորգ Բաղդասարյանը հայտարարեց, որ քրեական հետապնդումը դադարեցնելու մասին որոշումը պետք է կայացվի դատական նիստի ընթացքում: Մեղադրյալներից երկուսի եւ նրանց փաստաբանների բացակայությունը հաշվի առնելով՝ դա հնարավոր չէ: Պետրոս Պետրոսյանը միացավ իր գործընկերոջ կարծիքին:
«Հայտարարվեց, որ ամբաստանյալները եւ նրանց փաստաբանները ներկա չեն: Հետաքրքիր է՝ ո՞ր հոդվածով են նրանք ամբաստանյալներ, եւ ինչո՞ւ է խոսվում պաշտպանության մասին: Եթե մենք խոսում ենք Յուրի Խաչատուրովի եւ Սեյրան Օհանյանի մասին, ապա ինչո՞ւ են նրանք ամբաստանյալներ եւ ինչից են պաշտպանվում, եթե հոդված չկա: Այս պահին իմ պաշտպանյալին մեղադրում են հոդվածով, որը չկա ՔՕ-ում»,-վրդովմունք հայտնեց Հայկ Ալումյանը` նշելով դատավորի գործողությունների անօրինականությունը:
«Քրեական հետապնդում է իրականացվում է գոյություն չունեցող հոդվածով: Ինչի՞ եք Դուք վերածել օրենսդրությունն ու դատարանը»,-ասաց փաստաբանը՝ դատավորից պահանջելով դադարեցնել 300.1-րդ հոդվածով քրեական հետապնդումը: Նման կարծիք հայտնեց նաեւ փաստաբանց Արամ Վարդեւանյանը: Փաստաբանը հիշեցրեց, որ գործի դադարեցման մասին դատավորի որոշումը չի կարող պայմանավորված լինել որեւէ մեկի ներկայությամբ կամ բացակայությամբ, դա հրամայական է:
Հիշեցնենք, որ մարտի 25-ին ՍԴ-ն հրապարակել էր որոշման եզրափակիչ մասը, իսկ մարտի 29-ի երեկոյան՝ 42-էջանոց լրիվ տեքստը: ՍԴ որոշումը վերջնական է եւ ենթակա չէ բողոքարկման: ՍԴ-ն 300.1 հոդվածը համարել էր անորոշ իրավունքի եւ մեղսագրվող արարքի տեսակետից, պարզ չէ, թե ինչ կարգի տապալման մասին է խոսքը՝ հաշվի առնելով, որ հոդվածն ընդունվել է մի Սահմանադրությամբ, իսկ փորձել են կիրառել մեկ այլ Սահմանադրությամբ:
ՀՀ երկրորդ նախագահ Ռոբերտ Քոչարյանը, ՀԱՊԿ նախկին գլխավոր քարտուղար Յուրի Խաչատուրովը, պաշտպանության նախկին նախարար Սեյրան Օհանյանը եւ նախկին փոխվարչապետ Արմեն Գեւորգյանը մեղադրվում են հենց այդ հոդվածով՝ սահմանադրական կարգի տապալում: Փաստացի, դատարանը պետք է դադարեցնի այդ հոդվածով քրեական հետապնդումը վերը թվարկված անձանց, ինչպես նաեւ նմանատիպ մեղադրանքով այդ գործի շրջանակում անձանց նկատմամբ:
Արմեն Գեւորգյանի փաստաբան Էրիկ Ալեքսանյանը նույնպես պահանջեց դադարեցնել իր պաշտպանյալի նկատմամբ քրեական հետապնդումը ՔՕ 300.1-րդ հոդվածով:
Փաստաբան Արամ Վարդեւանյանը մեջբերեց ՔԴՕ 35-րդ հոդվածը, ըստ որի` դատարանը, հայտնաբերելով հետագա քրեական հետապնդման խոչընդոտները, ինքը պետք է միջոցներ ձեռնարկի այն դադարեցնելու համար, ինչը դատարանը չի անում: «Մեղադրող կողմը պնդում է, որ քանի որ Սահմանադրական դատարանը չի փոխել մեղադրյալի կարգավիճակը, նրանք չեն դադարում այդպիսին լինել: Սա ֆորմալիստական մոտեցում է՝ ոչնչով չարդարացված: Երկու մեղադրյալի նկատմամբ հետապնդումը պետք է դադարեցվի, մյուս երկուսի գործը պետք է շարունակվի, քանի որ ներկա են բոլոր կողմերը»,-ասաց փաստաբան Արամ Օրբելյանը: Նա շեշտեց, որ Սահմանադրական դատարանի որոշումից հետո պարզապես մեղադրանք չկա: Փաստաբանը թողեց հարցի տեխնիկական կողմը, որը որոշելու է դատարանը: «Եվ դատախազությանը պարտավորեցրեք ներողություն խնդրել»,-եզրափակեց Օրբելյանը:
Փաստաբան Հովհաննես Խուդոյանը նշեց, որ նիստը հետաձգելու որոշումը սխալ կլինի: «Դուք նրանց ներկայությունն ապահովելու օրինական հնարավորություն չեք ունենա, եւ այդպես շարունակ»,-նշեց փաստաբանը: Նրա խոսքով՝ իրավիճակի մեղավորները նրանք են, ովքեր իրավական տեսանկյունից կառուցել են քրեական գործը երերուն հիմքի վրա, եւ այժմ նաեւ պնդում են, որպեսզի այն շարունակվի: «Իրավական բացը մենք կլրացնենք»,-ասաց փաստաբանը՝ նշելով, որ չկա որեւէ գործողություն, որը կարելի է մեղսագրել մեղադրյալներին: Նրա խոսքով՝ ով հորինել է այդ գործը, թող նա էլ պատասխանի: Փաստաբանը նշեց, որ գլխավոր դատախազի՝ Սահմանադրական դատարան դիմելու արդյունքը նույնպես չի կարող արտացոլվել այս գործում: Եթե օրենսդրական խնդիր կա, թող լուծեն, սա այս գործընթացի վրա չի ազդել: Այժմ օրենսդրությունը նախատեսում է քրեական հետապնդման դադարեցում, նշեց փաստաբանը:
Դատախազ Բաղդասարյանը համաձայնեց, որ դատավորը պետք է քննարկի քրեական հետապնդումը դադարեցնելու հարցը, բայց միեւնույն ժամանակ` օրենսդրական բացը (մեղադրանքը վերաորակելու հետագա նպատակով-խմբ.), որի միջնորդությունը ներկայացրել է դատախազությունը: Եվ քանի որ Խաչատուրովի եւ Օհանյանի կարգավիճակը դեռ չի փոխվել, ապա նիստը պետք է հետաձգվի:
Դատավոր Դանիբեկյանը հիշեցրեց, որ վաղը Օհանյանի փաստաբան Կարեն Մեջլումյանը արձակուրդ է մեկնում, եւ ինչպե՞ս է Բաղդասարյանը պատկերացնում նիստերի հետաձգումը: Դատախազն ասաց, որ դա իր խնդիրը չէ, իսկ ՔԴՕ-ն բացառություններ չի ենթադրում:
Հատկանշական է, որ դատախազը՝ խոսելով միջնորդությունների համատեղ քննարկման անհրաժեշտության մասին, կատեգորիկ տոնով դատավորին ասաց. «Չեք կարող»:
Հայկ Ալումյանը հիշեցրեց, որ դատավորը չպետք է «քննարկի» եւ «որոշի» քրեական հետապնդումը դադարեցնելու հարցը. սա Սահմանադրական դատարանի որոշումից բխող հրամայական է: Միանալով իր գործընկերոջը` փաստաբան Արամ Վարդեւանյանը նկատեց, որ դա դատավորի պարտականությունն է, եւ ոչ մի բան չի կարող խանգարել Սահմանադրական դատարանի որոշման կատարմանը: Դատախազներն էլ, ինչպես նկատեց փաստաբանը, դատավորին մղում են հանցագործություն կատարելու. «Կա միայն մեկ փաստ. չկա հոդված, չկա վարույթ»:
Պաշտպանության եւ մեղադրող կողմի միջեւ վեճ սկսվեց այն հարցի շուրջ, թե արդյք դատավորը պարտավոր է սկսել նիստը եւ դրանից հետո հեռանալ խորհրդակցական սենյակ, թե ոչ: Դատախազները պնդում էին առաջին, փաստաբանները` երկրորդը: Էրիկ Ալեքսանյանն ընթերցեց ՔԴՕ համապատասխան դրույթը, համաձայն որի՝ գործով դատավորը կարող է ինքնուրույն որոշում կայացնել քրեական հետապնդումը դադարեցնելու մասին:
Կողմերին լսելուց հետո դատավորը հակվեց դատախազների կարծիքին: Հաշվի առնելով այն, որ Յուրի Խաչատուրովը, Սեյրան Օհանյանը եւ նրանց փաստաբանները բացակայում են, եւ նրանց ներկայությունն ապահովելու համար միջոցառումները երկար կտեւեն, դատավորը որոշեց քննարկել պաշտպանական միջնորդությունները այդ անձանց բացակայության պայմաններում:
Հայկ Ալումյանը հայտարարեց, որ քննարկելու բան չկա, դատավորը պետք է հեռանա խորհրդակցական սենյակ եւ որոշում կայացնի: Իսկ ահա դատախազների միջնորդությունը դեռ քննարկման կարիք ունի: «Ինչպե՞ս եք համատեղելու չքննարկվողն ու քննարկվողը: Մենք պահանջում ենք անհապաղ դադարեցնել քրեական հետապնդումը հանցակազմի բացակայության պատճառով: Ես կտրականապես դեմ եմ քննարկումներին: Հարցը պահանջում է ոչ թե քննարկում, այլ լուծում»,-ասաց փաստաբանը:
Պաշտպանության կողմը հիշեցրեց, որ միջնորդության առարկան տարբեր է, համապատասխանաբար, միասին դրանք չեն կարող քննարկվել:
Փաստաբանը հաստատեց, որ գլխավոր դատախազության կայքում արդեն տեղադրվել է հաղորդագրություն ՍԴ գլխավոր դատախազի դիմումի մասին, եւ նմանատիպ գործողությունները դատարանում անիմաստ են: Դատախազների քայլերը նպատակ ունեն հետաձգել գործը, հայտարարեց փաստաբանը՝ կրկնելով, որ քրեական հետապնդումը պետք է անհապաղ դադարեցվի:
Դատավորը դատախազներից փաստաբանների հնչեցրած տեղեկության մասով բացատրություն պահանջեց: Գեւորգ Բաղդասարյանը պատասխանեց, որ դատախազը չի կարող գործել դատարանի փոխարեն: Զգալով սեփական խոսքերի անտրամաբանությունը՝ դատախազը հայտարարեց, որ իրեն խանգարում է դատարանում աղմուկը: Այն բանից հետո, երբ լիակատար լռություն հաստատվեց, դատախազը մանրամասն բացատրեց, թե ինչ հոդվածներով է դիմել գլխավոր դատախազը: Նրա խոսքով՝ ՍԴ դիմումը որեւէ կերպ չի լուծում այստեղ բարձրացված հարցը: Դատավորը շարունակեց հարցնել գլխավոր դատախազի դիմումի պարունակության մասին: Բաղդասարյանը փորձեց ապացուցել, որ մեկը մյուսին չի փոխարինում եւ չի լրացնում:
Կողմերին լսելով՝ դատարանը որոշեց, որ միջնորդությունների համատեղ քննարկման անհրաժեշտություն չկա, եւ դատարանն այսօրվա նիստում կքննարկի միայն փաստաբանների միջնորդությունները:
