Մեխիկոյում ֆեմինիստական շարժման հարյուրավոր մասնակիցներ երթ են անցկացրել ընդդեմ կանանց նկատմամբ ոստիկանական բռնության, ցույցի մասնակիցները քանդել են պարիսպները եւ հարձակվել Ազգային պալատի շուրջ կին ոստիկանների շարասյան վրա, հայտնում է «ՌԻԱ Նովոստի»-ն:
«Ցուցարար ֆեմինիստուհիների խումբը քանդել է Ազգային պալատի մետաղական պարիսպը եւ բախման մեջ մտել այն պահպանող ոստիկանների հետ»,- հայտնել է Universal պարբերականը:
Անկարգությունների պատճառը Մեքսիկայի հարավ-արեւելքում գտնվող Տուլումա զբոսաշրջային գոտում Սալվադորից ներգաղթած կնոջ սպանությունն էր: Նա մահացել էր ձերբակալվելիս, որբ ոստիկաններից մեկը երկար ժամանակ նրան ծնկով սեղմել էր գետնին:
Լրատվամիջոցների տեղեկություններով՝ Մեխիկոյում ընթացած բողոքի երթին մասնակցել է ոչ պակաս 250 մարդ, շատերը զինված էին քլունգներով եւ մուրճերով: Ֆեմինիստուհիներն անցել են հեղափոխության հուշարձանից մինչեւ Կանտանա Ռոո նահանգի ներկայացուցչություն, որտեղ տեղի է ունեցել սպանությունը, այնուհետեւ ուղեւորվել են դեպի Ազգային պալատ:
Մեխիկոյում կանանց երթերը եւ ենթակառուցվածքները պաշտպանելու համար ուղարկում են ոստիկանության Atenas կանանց ջոկատները, սակայն դա ցուցարարներին հետ չի պահում իշխանության ներկայացուցիչների վրա հարձակումներից: Համացանցում տարածվող հոլովակում երեւում է, թե ինչպես են բազմության ձեռքից խլել եւ պարսպի հետեւ տարել ոստիկանության սպաներից մեկին: Երթի ժամանակ տուժածների կամ ձերբակալությունների մասին տեղեկություններ չեն հաղորդվում:
Վիճակագրության համաձայն՝ Մեքսիկայում ամեն օր կյանքից զրկվում է 101 կին, նրանց կեսից ավելին մահանում է գործընկերների կամ ազգականների ձեռքով: 2020 թվականի հունվարից հունիս, Վիճակագրության եւ աշխարհագրության ազգային ինստիտուտի տվյալներով, Մեքսիկայում սպանվել էն 1 844 կին, նրանցից 73 տոկոսը մահացել է զենքի կիրառմամբ կամ խեղդամահ անելով, 30 տոկոսը՝ իր տանը:
