ԱՄՆ ազգային տիեզերական գործակալությունը հրապարակել է Շղարշ դիֆուզային մառախուղի՝ Կարապ համաստեղության գերնոր աստղի մնացորդի նոր պատկերը, հաղորդում է «ՌԻԱ Նովոստին»:
Ըստ աստղագետների՝ «Հաբլ» աստղադիտակից ստացված պատկերները մշակելիս իրենք օգտագործել են մեթոդներ, որոնք թույլ են տալիս բացահայտել փոքրագույն մանրամասները, օրինակ՝ իոնացված գազի թելերը:
Մառախուղի ուսումնասիրություններն իրականացվել են Hubble Wide Field Camera 3 սարքի օգնությամբ։ Հինգ տարբեր ֆիլտրերն ու նորարարական հետմշակումը օգնել են բարելավվել կրկնակի իոնացված թթվածնի արտանետումները (ցույց է տրված կապույտով), ինչպես նաեւ իոնացված ջրածնի եւ ազոտի արտանետումները (ցույց է տրված կարմիրով):
Շղարշի մառախլապատությունը հայտնաբերել է անգլիացի գիտնական Ուիլյամ Հերշելը՝ 18-րդ դարի վերջին: Այն գտնվում է Երկրից մոտ 2100 լուսային տարի հեռավորության վրա, ինչը համեմատաբար մոտ է աստղագիտական տեսանկյունից: Մառախուղը ստեղծվել է աստղի պայթյունի հետեւանքով, որը տեղի է ունեցել մոտ 10 հազար տարի առաջ:
