Հարցին պետք է մոտենալ հավասարակշռված կերպով, առանց պարզունակ մոտեցումների եւ դուրս գալով «Թուրքիան մեր թշնամին է, Թուրքիան մեր թշնամին չէ» պատկերացումներից։ Այս մասին այսօր՝ ապրիլի 5–ին, խորհրդարանում լրագրողների հետ զրույցում ասաց «Լուսավոր Հայաստան» խմբակցության պատգամավոր Անի Սամսոնյանն՝ անդրադառնալով հարցին՝ ԼՀԿ–ն եթե իշխանության գա, Թուրքիայի հետ հարաբերություններում ի՞նչ մոտեցումներ է որդեգրելու։
«Մենք ունենք արտաքին եւ ներքին անվտանգության լուրջ խնդիրներ, մենք չենք կարողանում այսօր մեր հարաբերությունները նորմալ կարգավորել մեր բարեկամ երկրների հետ, ուր մնաց թե մեզ հակառակորդ երկրների հետ, ովքեր ամեն օր մեզ ֆիզիկապես սպառնում են։ Թե՛ Ադրբեջանի նախագահը, թե՛ Թուրքիան օրեցօր իրենց հռետորաբանությամբ մեզ սպառնում են, այս պայմաններում խոսել խաղաղասիրության մասին ես.... Ես նրանց թշնամի եմ համարում, եթե որեւէ մեկը քեզ սպառնում է ֆիզիկապես ոչնչացնել, դու ինչպես կարող ես բարեկամաբար տրամադրվել նրա նկատմամբ։ Ինչու են այդ խաղաղասիրության կոչերը միայն մեզ պարտադրվում, մե՞նք ենք ագրեսիա ցուցաբերում, ոչ, մեր նկատմամբ են ագրեսիա ցուցաբերում, թող խաղաղասիրության կոչեր պարտադրեն նրանց, ովքեր մեզ սպառնում են ֆիզիկապես ոչնչացնել, իսկ ովքեր սպառնում են մեր անվտանգությանը, մենք պիտի ուժեղանանք, որպեսզի ամեն պահի պատրաստ լինենք հակահարված տալու»,– ընդգծեց Անի Սամսոնյանը։
Հիշեցնենք՝ վերջին շրջանում իշխանությունները հայտարարում են Թուրքիայի հետ հարաբերություններում մոտեցումներ փոխելու մասին։ Մասնավորապես, մարտի 27–ին, Հանրային հեռուստաընկերության եթերում ՀՀ ԱԽ քարտուղար Արմեն Գրիգորյանը պատասխանելով հարցին, թե արդյո՞ք Թուրքիային համարում է թշնամի պետություն, ԱԽ քարտուղարն ասել էր, որ «եթե մենք գնում ենք տարածաշրջանի ապաշրջափակման, ապա մեր մոտեցումներում որոշակի շտկումներ պետք է լինեն եւ իրենք այդ ուղղությամբ աշխատում են»։
Հաջորդ օրը Արմավիրի մարզ կատարած այցի ժամանակ, վարչապետ Նիկոլ Փաշինյանն իր հերթին հայտարարել էր.
«Կարծում եմ՝ մենք տարածաշրջանի նկատմամբ մեր հայացքները պետք է փոխենք։ Մենք պետք է դրա մասին մտածենք։ Այո, ասված է, եւ մենք գիտենք, որ տարածաշրջանում ունենք թշնամիներ, բայց եկեք արձանագրենք՝ ինչքան մենք ենք համարում թշնամի, այնքան էլ մեզ են համարում թշնամի։ Ինչքան մեզ շատ են համարում թշնամի, մենք այդքան ավելի շատ ենք թշնամի համարում»։