Այդ աստիճան ճչացող ապօրինություններն ի սկզբանե պարզապես չպիտի լինեին։ Այս մասին այսօր՝ ապրիլի 6-ին, ֆեյսբուքյան իր էջում գրել է ՀՀ երկրորդ նախագահ Ռոբերտ Քոչարյանի որդին՝ Լեւոն Քոչարյանը։
Նշենք, որ այսօր դատարանը Ռոբերտ Քոչարյանի, Սեյրան Օհանյանի, Յուրի Խաչատուրովի եւ Արմեն Գեւորգյանի նկատմամբ ՔՕ 300.1 հոդվածով քրեական հետապնդումը դադարեցնելու մասին որոշում է կայացրել։
«ՍԴ որոշումից հետո, իսկ հիմա նաեւ Դանիբեկյանի որոշումից հետո, անդադար ստանում եմ շնորհավորանքներ հարազատներից, բազմաթիվ ծանոթ եւ անծանոթ մարդկանցից:
Իհարկե թվում է, թե պետք է ուրախանանք, սակայն հետհայացք գցելով անցած 3 տարիներին դժվար է ուրախանալ, քանի որ այդ աստիճան ճչացող ապօրինություններն ի սկզբանե պարզապես չպիտի լինեին, եւ առողջ հասարակությունը, անկախ սեփական նախասիրություններից, չպիտի հանդուրժեր այս ամենը. այնինչ քչերը համարձակություն ունեցան բարձրաձայնելու, իրավապահներից քչերը հրաժարվեցին այս խայտառակությանը մաս կազմելուց եւ միայն հաշված դատավորներ ունեցան խիզախություն գործել բացառապես օրենքով:
Իմ երախտագիտությունն եմ հայտնում հենց այս մարդկանց»,- գրել է Քոչարյանը։