ՀՀ երկրորդ նախագահ Ռոբերտ Քոչարյանի նկատմամբ անարդար եւ ապօրինի վերաբերմունքն այլեւս հեռանկար չէր կարող ունենալ: Այս մասին «Հայելի» ակումբին տված հարցազրույցում հայտարարեց Հայաստանի պաշտպանության նախկին փոխնախարար, ՀՀԿ ներկայացուցիչ Արտակ Զաքարյանը:
Հիշեցնենք, որ նախօրեին առաջին ատյանի դատարանը դադարեցրեց նախկին նախագահի նկատմամբ քրեական հետապնդումը 300.1 հոդվածով եւ արդարացրեց նրան:
«Ակնհայտ ապօրինի բաները չեն կարող հեռանկար ունենալ: Նիկոլն ինքը համոզվեց, որ հասարակությունը չի ընկալում»,- նշեց Զաքարյանը: Ըստ նրա՝ Փաշինյանը, հավանաբար, գիտակցում է, որ երկրի ներսում իր ստեղծած խնդիրները վաղը մեծ բեռ են դառնալու իր համար եւ փորձում է ինչ-որ կերպ մեղմել դրանք: Ինչ վերաբերում է Ռոբերտ Քոչարյանի՝ քաղաքականություն վերադառնալուն, նախկին փոխնախարարը շեշտեց, որ Ռոբերտ Քոչարյանը, հասկանալով հետագա զարգացումները, փորձում է լուծումներ առաջարկել:
«Բարձրացնելով Ռուսաստանի Դաշնության դերը տարածաշրջանում շատ խնդիրներ հնարավոր կլինի լուծել: Դա շատ կարեւոր գործոն է»,- ասաց Զաքարյանը՝ հիշեցնելով, որ երկրում փորձառու քաղաքական գործիչներն ու առաջնորդները շատ չեն:
