Թուրքիայի նախագահ Ռեջեփ Թայիփ Էրդողանը կարծում է, որ ավելի քան 100 պաշտոնաթող ծովակալների հայտարարությունը Մոնտրյոյի կենվենցիայի մասին ռազմական հեղաշրջման փորձի հոտ է արձակում, եւ դրա հետեւում անմիջականորեն կանգնած է հիմնական ընդդիմադիր Ժողովրդահանրապետական կուսակցությունը (ԺՀԿ):
Ավելի վաղ հաղորդվել էր, որ 103 նախկին ծովակալներ հայտարարություն են հրապարակել, որում դատապարտել են «Արդարություն եւ զարգացում» իշխող կուսակցությանը (ԱԶԿ) «Մոնտրյոյի կոնվենցիայի քննարկում սկսելու եւ բանակն իսլամացնելու համար: Մոնտրյոյի կոնվենցիան ստորագրվել է 1936 թվականին եւ Թուրքիային տրամադրել է Բոսֆորի ու Դարդանելի նեղուցների մասնակի վերահսկողություն:
Էրդողանն ասել է, որ հայտարարության հետեւում կանգնած են հիմնական ընդդիմադիր Ժողովրդահանրապետական կուսակցությունը եւ նրա առաջնորդ Քեմալ Քըլըչդարօղլուն: «Այս պաշտոնաթող գեներալների ուշադրության կենտրոնում է ԺՀԿ-ն»,- ասել է Էրդողանը: Նրա խոսքով՝ ԺՀԿ-ն փորձում է նվազեցնել հռչակագրի նշանակությունը, որը պետական հեղաշրջման փորձի հոտ է արձակում: «Ցավոք, պաշտոնաթող ծովակալները հետեւում են իրենց գլխավոր հրամանատար Քըլըչդարօղլուի հրահանգներին»,- ասել է նա:
Էրդողանի խոսքով՝ ԺՀԿ-ն փորձում է «ահաբեկիչների եւ դավադիրների դեմ» Թուրքիայի պայքարը կապել տնտեսության հետ:
Նրա քաղաքական ընդդիմախոսներից ոմանց խոսքով՝ Թուրքիայի նախագահը ծովակալների հայտարարությունն օգտագործել է, որ հանրության ուշադրությունը շեղի Թուրքիայի տնտեսական խնդիրներից:
