«Իմ քայլը». ՀՀ նախկին իշխանությունները դատական համակարգ են ստեղծել, որը հնարավոր չէ փրկել նույնիսկ հեղափոխությամբ Սահմանադրական դատարանի դատավորները հասարակությանը զրկել են ճշմարտությունն իմանալու հնարավորությունից, եւ չեն հասկացրել՝ մարտի 1-ի գործը լուծվել է, թե՞ ոչ: Այս մասին ապրիլի 8-ին լրագրողների հետ զրույցում ասաց Պաշտպանության եւ անվտանգության հարցերի մշտական խորհրդարանական հանձնաժողովի նախագահ, իշխող «Իմ քայլը» դաշինքի պատգամավոր Անդրանիկ Քոչարյանը՝ մեկնաբանելով Սահմանադրական դատարանի որոշումը Քրեական օրենսգրքի 300.1 հոդվածը Սահմանադրությանը հակասող ճանաչելու մասին: Դրա հիման վրա առաջին ատյանի դատարանը դադարեցրել է քրեական հետապնդումը Հայաստանի երկրորդ նախագահ Ռոբերտ Քոչարյանի եւ մյուսների նկատմամբ՝ հանցագործության փաստի բացակայության պատճառով:
Ըստ նրա՝ «Իմ քայլը» իշխող դաշինքը Սահմանադրական դատարանի երեք դատավոր է ընտրել, իսկ մնացած հինգը «նախապատրաստվել էին» դեռ ՍԴ նախկին նախագահ Հրայր Թովմասյանի նախագահության օրոք:
«Սահմանադրությունը Սահմանադրական դատարանին թույլ է տալիս դիտարկել ցանկացած հոդված: Ինձ մոտ տպավորություն է, որ եթե Ռոբերտ Քոչարյանին մեղադրեին խուլիգանության մեջ, այս հոդվածը կհայտարարվեր հակասահմանադրական: Սա է այդ դատավորների տրամաբանությունը»,- ասաց պատգամավորը:
Ըստ նրա՝ Սահմանադրական դատարանը պաշտպանում էր Հայաստանի երկրորդ նախագահի շահերը, իսկ տուժածների շահերը չպաշտպանված մնացին:
Այնուհետեւ պատգամավորը հարց ուղղեց, թե ինչու են նրանք («Իմ քայլը» իշխող բլոկը - խմբ.) ընտրել Սահմանադրական դատարանի երեք անդամի, որոնք հետագայում կողմ հանդես եկան վերը նշված որոշմանը: Անդրանիկ Քոչարյանը ներողություն խնդրեց Սահմանադրական դատարանի դատավորների ընտրության հարցում իր սխալ որոշման համար՝ նշելով, որ նախորդ իշխանությունները կարողացել են այնպիսի դատական համակարգ ստեղծել, որը հնարավոր չէ փրկել նույնիսկ իշխանափոխությամբ կամ հեղափոխությամբ:
Փաստացի, ըստ Քոչարյանի տրամաբանության, ստացվեց, որ եթե դատավորը չի կատարում իշխանությունների կամքը, նա «վատ դատավոր» է: