Թուրքիան կասեցրել էր իտալական Leonardo ընկերությունից ուղղաթիռներ ձեռք բերելու 70 միլիոն եվրո արժողությամբ գործարքը երկրների միջեւ դիվանագիտական սկանդալից հետո, կիրակի գրել են la Repubblica եւ Il Fatto Quotidiano խոշոր պարբերականները:
Հինգշաբթի Իտալիայի վարչապետ Մարիո Դրագին բնութագրել է Թուրքիայի առաջնորդ Ռեջեփ Թայիփ Էրդողանին՝ որպես դիկտատոր՝ նշելով նրա հետ համագործակցելու անհրաժեշտությունը: Դրագին նաեւ հայտարարել է, որ «չի կիսում Էրդողանի անպատեհ վարքը» Եվրահանձնաժողովի ղեկավար Ուրսուլա ֆոն դեր Լյայենի նկատմամբ: Թուրքիայի ԱԳ նախարար Մեւլյութ Չավուշօղլուն Թուրքիայի նախագահի հասցեին արված Դրագիի հայտարարություններն անվանել է անընդունելի եւ պոպուլիստական հռետորություն. Թուրքիայի ԱԳՆ-ն հայտնել է Իտալիայից իր դեսպանին կանչելու մասին, հաղորդում է ՌԻԱ Նովոստի-ն:
Պարբերականների տեղեկություններով՝ Թուրքիայի իշխանությունները պահանջում են պաշտոնական ներողություն կառավարությունից եւ չեն պատրաստվում բավարարվել դիվանագիտական ալիքներով պարզաբանումներով: «Դեռեւս Հռոմից չեն ստացվել պատասխաններ, Թուրքիայի իշխանությունները սկսել են փոխանցել սպառնացող ազդանշաններ»,-ասված է la Repubblica-ի հոդվածում:
Այսպես, ներկայում սառեցվել է ուսումնական ուղղաթիռների գնման՝ 70 միլիոն եվրո արժողությամբ գործարքը, որը պետք է ստորագրվեր առաջիկա օրերին: Նաեւ նախազգուշացում են ստացել երեք իտալական ընկերություններ, որոնցից է խոշոր էներգետիկ Ansaldo Energia ընկերությունը, որը կառուցում է էլեկտրակայաններ Թուրքիայում: