Հայաստանում այս տարվա հունվարի 1-ից Թուրքիայից գյուղատնտեսական արտադրանքի իրացման արգելք է սահմանվել: Այնուամենայնիվ, Իրանից ներկրումն իրականացվում է: Այս մասին այսօր՝ ապրիլի 12-ին, ԱԺ տարածաշրջանային եւ եվրասիական ինտեգրման մշտական հանձնաժողովի նիստում ասաց ՀՀ էկոնոմիկայի փոխնախարար Վարոս Սիմոնյանը՝ պատասխանելով պատգամավորների հարցին, թե ինչ միջոցառումներ են ձեռնարկվում գյուղմթերքի տեղական արտադրողին պաշտպանելու համար:
Պատգամավորների խոսքով՝ ջերմոցների սեփականատերերի մոտ լուրջ խնդիրներ են առաջացել Իրանից եւ Թուրքիայից ներկրված լոլիկի եւ պղպեղի հետ:
Ի պատասխան՝ փոխնախարարը նկատեց, որ այս տարի ձմեռը բավական խստաշունչ էր: Արդյունքում երկրում գյուղմթերքի գինը բարձրացել է: «ՊԵԿ համապատասխան հաշվարկների համաձայն՝ Իրանի հետ սահմանին մաքսային ձեւակերպումն իրականացվում է այնպես եւ այնպիսի գներով, որ տեղական արտադրությունը չտուժի եւ գտնվի բարենպաստ պայմաններում»,-վստահեցրեց Սիմոնյանը:
Նա նշեց, որ խնդիրն այն է, որ տվյալ գյուղմթերքի գներն աճել են բացառապես պահանջարկի աճի պատճառով: «Գյուղմթերքի տեղական արտադրողին պաշտպանելու համար առկա են բոլոր համապատասխան գործիքները»,-եզրափակեց պաշտոնյան: