ՀՀ երկրորդ նախագահ Ռոբերտ Քոչարյանի գործով դատավարությունը շարունակվում է: Մնացել է երկու ամբաստանյալ՝ բացի նախկին նախագահից, նախկին փոխվարչապետ Արմեն Գեւորգյանից:
Երկու այլ ամբաստանյալներ՝ գեներալ-գնդապետ, պաշտպանության նախկին նախարար Սեյրան Օհանյանը եւ ՀԱՊԿ նախկին գլխավոր քարտուղար Յուրի Խաչատուրովն այլեւս ներգրավված չեն գործընթացում: Նախորդ նիստի ժամանակ դատավոր Աննա Դանիբեկյանը Սահմանադրական դատարանի որոշման հիման վրա դադարեցրեց բոլոր մեղադրյալների նկատմամբ քրեական հետապնդումը 300.1 հոդվածով: Ռոբերտ Քոչարյանը, Արմեն Գեւորգյանը, Սեյրան Օհանյանը եւ Յուրի Խաչատուրովը արդարացվեցին 300.1 հոդվածով:
Սակայն Քոչարյանին եւ Գեւորգյանին մեղադրում են ոչ միայն սահմանադրական կարգը տապալելու մեջ. նախկին նախագահին մեղադրանք է առաջադրվել 311-րդ հոդվածի 4-րդ մասի 2-րդ կետով: Նախկին փոխվարչապետին մեղադրանք է առաջադրվել 311-րդ հոդվածի 4-րդ մասի 2-րդ կետով, 190-րդ հոդվածի 3-րդ մասի 1-ին կետով:
Նախկին նախագահը մեղադրվում է 3 միլիոն դոլար կաշառք ստանալու մեջ, իբր «Թի-Էս-Էս-Սի Արմենիա» ՍՊԸ-ի միակ մասնակից եւ տնօրեն Սիլվա Համբարձումյանի օգտին գործողությունների իրականացմանը չխոչընդոտելու մեջ, մասնավորապես` ընդերքի ուսումնասիրման հատուկ լիցենզիաների գծով ընկերության բաժնեմասերի 100% վաճառքի գործարք: Գումարը, իբր, փոխանցվել է 2008-ի փետրվարին եւ մայիսին՝ Սամվել Մայրապետյանի օժանդակությամբ:
Նախկին փոխվարչապետը մեղադրվում է նաեւ կաշառք վերցնելու եւ փողերի լվացման մեջ:
Նշենք, որ բոլոր դատական ատյանները, որոնք քննում են Ռոբերտ Քոչարյանին գրավի դիմաց ազատ արձակելու հարցը, մեղադրանքի այդ մասով կասկածները միաձայն անհիմն են համարել: