Թուրքիան եւ Ադրբեջանը մեր թշնամիներն են, իսկ նրանք մեզ են թշնամի համարում, բայց հարցն այլ է: Այս մասին ապրիլի 14-ին Ազգային ժողովի նիստին Կառավարության գործունեության մասին հաշվետվության ներկայացման ժամանակ, պատասխանելով պատգամավորների հարցերին, ասաց ՀՀ վարչապետ Նիկոլ Փաշինյանը:
Ըստ նրա, այդ հարցը նույնիսկ չպետք է քննարկվի, քանի որ ամեն ինչ արդեն պարզ է: «Մի՞թե մենք պետք է պատասխանենք այս հարցին: Այս պատմությունը՝ վերջին պատերազմը, վերջին իրադարձությունները մեզ արդեն ցույց տվեցին, եւ ուստի դա քննարկման թեմա չէ»,- ասաց վարչապետը:
Այնուամենայնիվ, կառավարության ղեկավարը հարց ուղղեց, թե ինչ անել այս ամենի հետ: Նրա կարծիքով՝ այն, որ ժողովուրդները միմյանց թշնամի են համարում, ոչ ոքի օգուտ չի բերում՝ չնայած պատմության մեջ ներկայումս էլ կան հակառակ օրինակներ, երբ թշնամական երկրները, անգամ իրար նկատմամբ տարածքային պահանջներ ունենալով, իրար հետ առեւտուր են անում, բաց սահմաններ ունեն, զարգացնում են փոխադարձ զբոսաշրջությունը եւ այլն: Ընդ որում, այս երկրների ժողովուրդները միմյանց շարունակում են թշնամի համարել:
«Այո, մենք պատմական թշնամիներ ենք, բայց հարցն այն է, թե ի՞նչ ենք անելու հետո: Արդյո՞ք այս թշնամությունը վերահսկողության տակ ենք պահելու, թե՞ թույլ ենք տալու, որ այն դուրս գա վերահսկողությունից: Այսինքն, մեր տարածաշրջանը հավերժ թշնամանքի տարածաշրջա՞ն է: Ահա թե որ հարցին մենք պետք է պատասխանենք»,- ասել է կառավարության ղեկավարը՝ առանց այդ նույն հարցին պատասխանելու:
