ԱԷՄԳ-ի տեսուչներն այցելել են իրանական Նաթանզում ուրանի հարստացման գործարան, որտեղ տեղի է ունեցել վթարը, «ՌԻԱ Նովոստի»-ին հայտնել է գործակալության ներկայացուցիչ Ֆրեդերիկ Դալը։
«ԱԷՄԳ-ի տեսուչները Իրանում շարունակում են ստուգումներն ու դիտարկումները եւ այսօր այցելել են Նաթանզի ուրանի հարստացման գործարան»,- ասել է Դալը:
Նա հավելել է, որ ԱԷՄԳ-ը կշարունակի գործակալության Կառավարիչների խորհրդին զեկուցել Իրանի միջուկային ծրագրի հետ կապված բոլոր վերջին իրադարձությունների վերաբերյալ:
Իրանական կողմը ապրիլի 11-ին հայտարարել էր, որ Նաթանզի միջուկային կայանի էլեկտրաէներգիայի բաշխման ցանցում վթար է գրանցվել: Իրանի ատոմային էներգիայի կազմակերպության ղեկավար Ալի Աքբար Սալեհին միջադեպը «միջուկային ահաբեկչության դրսեւորում» է որակել։
